今日約左小豬爸、小豬媽仲有LULU妹去左旺角金魚街行街街，主要都係去睇吓D寄居蟹仔。
不過因為佢地工作上仲有D手尾未完成，所以就遲少少先出到去旺角，所以就俾大肥豬捉左去花墟睇嘢，因為大肥豬成日都想買番盆萬年青擺係電視櫃面(因為之前風水師講過擺係嗰個位係好呀！)。
我地行左好耐，都睇唔啱心水，因為每一間嘅萬年青都超大盆，點擺係電視櫃呀。
我地行左將成條街行左兩次，最後係一間小花店見到有一盆盆$10嘅細細地萬年青買，終於我地就買左盆，仲係買埋一個靚靚花盆，打算返屋企將佢地合已為一。
點知...可能嗰位花店姐姐知道我地想移盆，佢好好人咁幫我地整埋，仲整得幾靚添呀！
哈哈~~真係好啦，等我慳左一個功夫，又唔洗整污穢屋企。
買完盆萬年青，時間又剛剛好，小豬媽佢地出到旺角啦！
我地就去地下鐵匯合埋佢地，就向金魚街出發！
我地去到金魚街，真係見到好多間都有寄居蟹買，有大有細、又有平有貴...真係勁多，唔睇都唔知原來依家真係好HIT呀！
當我地行緊街街時候，我細佬同埋佢女朋友又嚟一齊行，所以我地一行七人就繼續行街街啦！
開頭都以為係小豬爸有興趣去買蟹仔，點知...原來最興奮嘅個竟然係小豬媽，佢仲買左幾隻蟹仔叫LULU妹幫佢手養，又買左一個大魚缸、好多擺設俾佢地做新居，真係幾攪笑呀！
我原本都係15/16買唔買蟹仔，不過俾小豬媽引誘之下，最後我都收留左兩隻蟹仔，依兩隻蟹仔都好靚呀！
一隻係白色襯珍珠殼，依隻蟹仔仲好抵，都係$10呀！
另一隻係紅色，成隻龍蝦咁。因為依個殼係特別款，所以就要貴少少！
介紹埋小豬媽至愛先，依隻就係啦~~
我養都係用左好少錢呀，因為兩隻蟹仔係小豬媽送俾我(仲好攪笑咁叫我好好照顧佢兩粒孫呀！)，之後，因為LULU妹有間新屋關係，佢就讓間細屋俾我，我只係買少少鹽同沙，就可以養啦...真係勁抵呀！哈哈~~
大家買完晒嘢之後，就搭車返我屋企坐吓等食飯啦！
因為今晚我請小豬爸佢地去我地屋企附近間泰國嘢食飯。真係抵呀..七個人都係食左三百幾蚊。
食完飯就送佢地去搭巴士返屋企，因為大家都趕住返屋企玩蟹仔嘛！
今日真係好開心，好耐都冇試過一家人咁開心咁行街街啦！
不過....當我睇住佢地上巴士到巴士離開站時，個心有少少唔捨得嘅感覺，可能係第一次睇住佢地離開啦！真係唔係好習慣呀~~
開心事係未完呀...當佢地返到屋企時，就開左個視像MSN，等我睇住佢地幫我對蟹仔設計新居，真係勁好笑，我隔空佈置...
哈哈~~聽晚返小豬媽屋企食飯就可以接走蟹仔啦！
沒有留言:
發佈留言