又買指甲油

前日小豬媽同小豬爸去拍拖行街街時睇中左對鞋，不過間鋪頭依家做緊買一送一，係突然間又睇唔啱第二對，所以就冇即時買，打算遲D叫同埋我一齊去睇，每人買一對咁啦！

因為依間鋪頭係柴灣都有分店，所以今日放工小豬媽上左嚟JOIN我，同我一齊去睇鞋仔啦！

一入到鋪頭，小豬媽就先試之前睇中左嗰對鞋，又真係幾好，所以好快就決定買嗰對。睇左好耐，都冇合我心水嘅鞋，不過又俾小豬媽睇中左一對金色露腳趾嘅鞋，試上腳又真係幾好睇，所以最後小豬媽就滿載而歸，買左兩對靚靚鞋啦！

當我地離開間鞋鋪，準備搭車走時，小豬媽突然話：買左露腳趾鞋係唔係應該要塗指甲油呢？

係依個時候就醒起我已經將我家中所有指甲油搬到新居，所以小豬媽家係冇指甲油。所以就陪左小豬媽去買指甲油啦！

基本上我已經有好多...好多...好多依個牌子嘅指甲油，都差唔多齊色啦！所以都係打算陪小豬媽買就算。

不過...當小豬媽係度試色嘅時候，我自己又抵受唔住試埋一份，最後當然又係買左啦！我地兩個人買左三支，我就買左依兩支，小豬媽就只係買左相入面嘅紫色。

哈哈....我個指甲油存放盒又多兩支啦....都已經唔夠位擺啦！

不過真係好奇怪，明明叫自己唔好買，不過見到D靚顏色就又心思思去買。其實好多顏色都係差唔多，我都試過買左返屋企先發現買左相同色呀！真係唔明自己點解仲可以繼續一見到靚就買....唔通依D就係女性天生本領(唉....又係一個藉口俾自己買嘢)。