韓燒宴

今日放工就即刻同班同事一齊走人，因為我地有個重要節目，就係一齊去食韓燒啦！

我地時間剛剛好，去到可以食happy hour時間(即5:30-7:30)，平幾十蚊嘛！哈哈~~

雖然我地係食happy hour時間，不過佢地D野食又幾OK，都幾乾淨，又有好多熱食供應，都差唔多啦！

當我地個韓燒宴開始時，我唔係去拎肉類去燒，而係同糖糖去攻佢D三文魚，真係傻傻地，去韓國地方食日本野。不過冇法啦...我依個三文魚怪點會放過呀...哈哈！

食左一輪三文魚，終於食正常野啦！我燒左好多豬肉..魷魚...，好多係濃濃地呀。唔緊要啦，又唔係成日食，濃濃地都幾香口呀.....哈哈~~不過我成晚最成功就係炒金菇，冇濃之餘都幾香呀！

食都一半時，竟然俾我發現到有雪糕食，我依個雪糕怪當然又唔會放過機會，即刻去拎啦。我仲好叻咁整左三球雪糕加啫喱，個賣相都幾OK呀！

我地邊玩邊食邊影相，個個都食到好飽飽咁走，都真係好開心，快樂不知時日過，話咁快就夠鐘要走人啦！

我地食完韓燒之後，我地成班仲去左銅鑼灣地帶扭蛋，平日都唔多扭蛋嘅我，都貪得意扭左兩隻添。

第一次扭到就係米奇公仔，之後我地『莊』到好似係MARIE，咁就去扭啦。結果...真係MARIE呀！(哈哈~~真係麻煩晒糖糖幫我去偷窺啦~)

今日玩得好開心呀，真係要攪多D活動一齊去玩先得！

真過分...

由上個星期六開始，屋企個上網系統都有少少唔隱定，會用用吓就斷線，總之就係好唔順暢，攪到個人都忟忟地。因為成日睇睇吓BLOG就斷線，好煩嘛！

就係因為依個原因，大肥豬就係星期六當晚打左去有線查詢吓係乜問題，點知我地打去客戶服務熱線都係等...等....等，等左好耐先有專人聽，但又話叫我地留電話再等人回覆。

到等左成個幾鐘都冇人覆，大肥豬就再打去熱線，點知...又係等..等....等，等到平日唔多發脾氣嘅大肥豬都開始火火地咁問個客戶服務人員幾時先知係乜問題。唔知係唔係火火地關係，之後就好快咁有人聽電話，仲話幫我地BOOK師傅星期三晚嚟CHECK(即今日)。

嘩...有冇攪錯，要等四日先有人嚟CHECK，不過都冇法啦，都係要等啦~~

因為約左今晚CHECK，所以今日係奶奶度食完飯就快快咁返屋企，等師傅整啦！

點知...等吓一個鐘，等吓一個鐘，等到依家十一點幾都仲未有人嚟CHECK，佢地就連一個電話都冇打過嚟，真係勁過分呀！都唔知佢地係乜服務態度，嚟唔到都應該打嚟交代吓，要人等咁耐。如果等佢地救命真係都唔知點算呀！

由於今日斷線情況又好左少少，所以大肥豬話明天先打電話去投訴。不過...我地已經決定左約滿之後就一定唔再續約依個服務咁差嘅有線寬頻。

等左兩年..終於出左啦！

大家睇到個標題，係唔係諗緊我等乜等左兩年呢？我等嘅就係依本小說啦！

本身我係李敏嘅小FANS，我係俾佢所寫嘅愛情小說吸引，之後就愛上左睇佢嘅小說啦！基本上佢所有嘅小說我都已經擁有，不過因為依家都放晒係小豬媽屋企，所以POST唔到個莊景俾大家睇添。

除左寫愛情小說之外，佢仲同其他作著合著左幾本書，不過依D就唔係愛情小說，有縣穎片、探險、推理等，本本都好好睇呀！

係咁多合著嘅小說入面，我就最鐘意睇女法醫宋雨日系列，真係好好睇，內容都好緊張....仲好激激呀！因為我係習慣臨訓時睇書，睇佢第三輯時，試過當睇兇手講述殺人經過時，真係個心係跳左出嚟咁，好驚...驚到訓唔到呀！

不過，當我睇完第三輯之後，等左好耐都未見有第四輯嘅出現。一等就等左兩年.....終於趁今年書展出左啦！當我見到三聯有得買時，就即刻買左啦！

好耐都未試過煲書啦...睇睇吓個驚嘅感覺又開始番嚟添。係唔係衰呢....又要驚又要睇....哈哈~~

真係希望睇完之後，好快會出第五輯，唔洗又等幾年啦！不過最想都係李敏快D自己出多幾本愛情小說，因為真係好想睇呀~~

有玉桂狗換啦~

依排見到好多BLOG友仔都去左麥當當Hello Kitty Messenger嘅公仔，我對Hello Kitty嘅興趣不大，所以都冇打算換。

不過對隻黑色特別版Kitty就有少少興趣，特別D嘛！最衰就係我屋企附近冇24小時嘅麥當當，冇得自己換添，不過我已經托左朋友仔幫我換，希望有好消息啦！

原來麥當當除左Hello Kitty 換之外，都仲有另一樣公仔換呀......就係我嘅至愛玉桂狗啦。如果唔係收到糖糖個E-Mail，我都唔知有得換呀！(真係唔該晒糖糖嘅通風報信呀~)

買一個開心樂園餐就免費送一個，一共有四Set，個個都好得意呀！

為左換依個公仔，今日就冒住爆痘痘嘅危險，Lunch走左去食個開心樂園餐，換左個玉桂狗香蕉形筆袋，係唔係好得意呢？哈哈~~

 

嚟緊四個星期我都會去食一餐麥當當，換整晒佢先得。不過食完就要食番D涼茶清清熱氣先得啦！

玩指甲花

上次陪小豬媽去買指甲油時，自己又買左兩支，就係咁.......條引又出左嚟，又係時候玩吓指甲啦！

之前有位BLOG友仔介紹左SKIN FOOD隻朱古力色嘅甲油俾我，咁我咪去睇吓，又真係幾特別。就係咁，我個指甲盒又多左支指甲啦...哈哈~~

尋晚見冇乜野做，煮完飯仔之後就塗左依隻新色啦！

係唔係好靚呢？哈哈....我仲貼左D白色小蝴蝶上去，睇落都幾襯呀！

我就覺得自己嘅指甲唔太長，所以好似唔係太好睇，下次長多少少就仲靚啦！

因為工作關係，平日都唔可以塗得太激嘅顏色，但其實我係好鐘意塗指甲，所以趁依幾個星期可以大玩特玩啦！

新菜式的晚餐

今日又做左個乖乖老婆煮飯仔啦！我仲好叻咁煮左個新菜式添...

依個就係我地個豐富晚餐呀.....兩餸一湯，好好味呀！

首先煮左一個蠔油菜芯，唔知係唔係D菜芯唔係時候，好似唔係太靚，唔好食。記得小豬媽講過話夏天係食瓜多，不過買餸時又諗唔到食乜，見到好多太太們都買，就咁就買左....下次都係買瓜瓜啦！

另一個餸就係沙嗲肉片炒金茹，依個餸我都係第一次整，所以都好擔心整得唔好食，一路煮..一邊驚，好怕失敗左之後今晚大肥豬就冇啖好食。當我完成左之後，第一時間就叫大肥豬試食，好在個答案係好味，咁我先放心晒。我自己就覺得OK啦...不過係個汁少左D，第我下次煮留意吓先啦！

我仲煲左莞茜皮蛋魚片湯，依個湯都係第一次整，因為依排我十分青春，出左好多痘痘，所以就諗到煲依個湯，冇咁熱氣呀！哈哈~~

又成功煮左一餐豐富嘅晚餐，自己都覺得廚藝開始有進步，連大肥豬都讚，話我嘅廚藝開始見得吓人啦！聽完都真係有少少飄飄然呀！

對住個爐頭炒餸，尤其係依個咁熱嘅天氣，你都唔好話唔辛苦，依幾次煮完飯出嚟都成身濕晒。不過...見到大肥豬食得咁開心，又聽都佢讚我嘅時候，都真係好開心，覺得都係值得呀！

我會繼續努力，煮多D好野出嚟......哈哈~~

《Sharing Life Y! BLOG 生活誌》到手啦！

等左好幾日，心急左好幾日，今日終於都收到啦！

知道YAHOO本《Sharing Life Y! BLOG 生活誌》出版嗰日，見到好多BLOG友仔都話已經擁有左，我都好心急好想睇(大肥豬比我仲心急呀！)。

不過因為大肥豬依排有大PROJECT做緊冇時間陪我去，加上我又怕人多，所以唔去書展，唔可以即刻買嚟睇。當我去書店時，佢地又冇得買，話要等書展完先返貨。

等左好幾日，終於今日收到啦！

收到嘅時候，我就即刻搵..搵...搵，哈哈...終於搵到啦！大家打開第30頁啦，就會見到..................

完全冇諗過我篇介紹排咁前，仲等我係由後面搵上嚟呀！哈哈~~

好幸運地可以得到YAHOO的邀請，能成為其中一份子，真係感到好光榮，好高興....總之就係好開心啦！

其實係幾個月前我收到邀請時，到已經好想話俾大家知我依件開心事，不過為左俾少少驚喜大家，所以就等出版先同大家分享我依個喜悅呀！

我打算會買多一本做留念，留返N年後俾我個仔仔/女女睇，等佢知道我都出過1/50嘅書。(因為以我嘅材料係冇可以會出到書呀！哈哈~)

除左小肥豬嘅兩頁介紹之外，仲介紹左好多人氣BLOG友仔呀，大家有興趣都可以買返留念呀！YAHOO會將扣除成本後用作慈善用途，支持吓呀！

又打嚟

係上個星期六曾經收過一位自稱係某纖體公司職員打嚟，佢一嚟就知道我姓乜，又話我係曾經打過俾佢地問有關纖體服務，依家打嚟係回答問題。

當我話冇打過俾佢地時，個職員又話佢公司依家做緊一個代言人活動，問我有冇興趣。因為嗰時準備緊整打邊爐嘢，所以係佢未講完嘅時候，我就話冇興趣…收左佢線。

當時真係好出奇，點解佢地會知我D資料。因為我係唔信靠依D公司就可以減肥，覺得依D依呃人多，所以基本上我係唔會同依D公司有任何接觸。

點知…今日放工途中又收到依間纖體公司電話，又係講番同一段說話，真係勁煩呀！已經同佢講左曾經有人打過俾我，叫佢地唔好再打嚟！

問佢地點解會有我D資料時，個職員又話係我曾打過去佢公司。咁我話冇打過去時，佢就講得唔清唔楚，都冇正式答我問題就收左我線。

真係好唔明白，點解佢地會有我嘅資料，唔知會唔會係平日寄抽獎嘢嘅時候，俾人拎左D資料。依家諗諗吓都真係覺得驚驚地！

換殼啦...

係前一排買左兩個大SIZE嘅殼想俾蟹仔換，可能大過頭，所以一路都冇見佢地有換殼嘅象徵。所以係上星期日，當我地陪小豬媽去旺角買嘢嘅時候，我買左兩個比上次細D嘅殼，睇吓佢地會唔會換。

點知…係星期一朝早，我望到原到嗰隻頑皮白色蟹仔唔見左，只係得番個殼，都真係驚驚地。不過係同一個時段，我又見到新買番嚟個殼就爬吓爬吓咁，依個時候我就知道......原來蟹仔真係換左殼啦！睇見都真係好開心呀！哈哈~~

不過因為趕返工，未有足夠時間睇清楚。但夜晚返到屋企又睇唔到，因為LULU妹話佢地換殼後係會爬入沙埋幾日識應吓，唔可以所攪佢，以又冇得睇。(都真係有少少失望呀！)

尋晚終於係我整完晚餐俾佢地食嘅時候出嚟啦。可能蟹仔嗅到火龍果香味，所以走出嚟啦！哈哈...

真係換左殼，好得意呀！雖然睇唔到佢換個過程，都唔緊要，知佢識換都已經好開心啦。

我仲影左佢食嘢添，不過就要好細心睇先知佢食緊野呀！(大家睇唔睇到呢?)

唉...次次都係依隻白色蟹仔有動態，紅色嗰隻成日都好似好懶咁唔爬吓，真係令我有少少擔心添！

與小茵的約會

今晚我又去左同BLOG友仔食飯啦！ 今次依位朋友仔可以話係相識由BEAR BEAR開始，因為我嗰一套7-11 BEAR BEAR 就係因為佢送埋最後一隻俾我，咁先可以齊晒啦！係上一次見面都係交換禮物咁，所以今日都可以話係第二次見面，先有機會傾餐飽啦！

哈哈…飯局另一位主角就係小茵啦…不過話時話，我地都好似，大家都係叫KATHY，仲要個中文名都係叫茵，真係橋啦！

我地去左旺角間POKKA餐廳食飯，因為小茵有八折咭抵D嘛！不過食乜都係其次，因為我地個目的都係傾計。

我地叫左個坐左一陣，就ORDER左一客鰻魚飯同三文魚子意粉。係開始食野前，小茵就提意我地影相先(可能知我之前成日唔記得影相啦~)，咁我就叫左個店員幫我哋影，不過都唔知佢係唔識影相定係點，影到我地得番半個頭，真激氣！好在坐我哋隔離枱位靚太知道我哋想影合照，主動幫我哋影，先有張靚靚合照呀！

係成個飯局入面，我地乜都傾得一餐，傾耐左真係發覺我地都有幾多野係相似。當然我地講得最多係迪迪尼啦，因為大家都係好鐘意去迪迪尼同埋又有全年通行証，我地仲約左下次一齊入去玩添！

小茵真客氣，送左份入小禮物俾我，係一支玉桂狗筆呀！收嗰時真係好開心，冇諗過有禮物之餘，仲要係我至愛嘅玉桂狗，因為我都好少提我鐘意玉桂狗，小茵真係好細心呀！我都冇準備到禮物哦，攪到我真係唔好意思添！

今晚個飯局真係好開心，大家都傾得好投契，真係好開心又可以識到小茵依位朋友仔，好想快D可以一齊去迪迪尼玩呀！

學校飯局

今晚又係一年一度學校飯局，今次去左杏花村某間酒樓食飯。

由放工至開席都仲有一段時間，所以就約左幾位靚女同事放工去杏花新城影吓相。我地先去左玩嗰個小天使音樂泉影相，再去附近個冒險樂園影，所以都影左好多相呀！

因為唔太方便將各靚女嘅合照相POST上嚟，所以大家睇唔到，俾唯一嘅單人照大家睇住先啦....哈哈~~

到時間差唔多，就去酒樓準備食飯啦！

係飯局進行其間，有抽獎活動，一向黑仔王嘅我都次次有抽獎都係抽到最底面值，所以我都完全冇期望。終於我抽到嘅就係........五十蚊！哈哈...都覺得自己進步左啦....唔係抽到廿蚊，都幾好呀，都係一個小小嘅幸運，有好過冇嘛~~

不過有樣好攪笑，我上年因為有事冇參加飯局，請同事幫我抽就抽到大獎，今年自己抽番就又係依D細獎。唔通依一個就個提示.....我唔再去飯局，就有好野抽到呀！哈哈哈~~

倒掛金钩

今日係難得嘅DAY OFF，仲要係大肥豬要返工，難得可以一個人霸晒成張床，當然訓到晏D，做番一隻懶訓豬啦！

訓醒之後，就去睇我蟹仔......點知又有新動態俾我見到啦！

嚟一個倒掛金钩

依隻頑皮蟹仔用個鉗夾住左粒假椰子，我估佢夾得好實，我嘗試想幫佢放回沙堆上都唔得呀！勁呀...唔知佢係點爬完上去之後做依個倒掛金钩呢？真攪笑....

等左一陣，佢都冇動靜轉POST，咁我就去洗手間執番D眼耳口鼻啦。

點知出嚟時又見佢有係咁......開始爬番落嚟啦！

真激氣，又睇唔到佢爬樹過程。今次佢又係度HOLD左好耐，唉....因為要落街買野，所以唔等啦！

不過真係唔明點解次次有近動態都係依一隻白色小蟹，另一隻都冇依D動作，唔通因為品種問題？

嘩...如果有一日兩隻小蟹都爬晒上樹，咁實勁開心呀！

三個靚太約會

今日又去左同BLOG友仔食飯，進行我地個靚太聚會啦！出席嘅靚太有：已為鄭靚太嘅蚊蚊，同埋P太AHWIN。

其實由我地係未婚嘅聚會已經約好左，等大家BIG DAY完晒之後，就約出嚟大食日本野(因為嗰時大家都為結婚要KEEP FIT)。不過婚後大家都一直忙忙地，所以約唔到，等到今日先進行我地個靚太飯局呀！

今日我地去左蚊蚊介紹嘅旺角瀧潭食日式放題，嗰度D野都幾好味，D三文魚又好新鮮，種類都算多....我地都叫左好多野食呀....大家食到飽飽咁離開。

我地三個靚太邊食邊傾，講吓大家嘅婚後生活咁啦！講講吓...原來大家嘅另一半都有D相似嘅地方，都真係幾好笑。之後大家乜都講吓...總之就細聲講大聲笑咁，都真係好開心呀！

隨住個放題食個半鐘，我地今日個靚太飯局就結束啦~~

當我上到小巴先醒起又唔記得同佢地影相添，可能我地傾得太投入唔記得左啦！

不過唔緊要，下次我地再去玩過，到時再影番夠本。哈哈~~

配件整備

幫我對蟹仔轉左個豪宅之後，因為仲未買豪宅內的配件，所以感覺都好空空咁，都唔靚！

當我前幾日行街街時，買左一個大水池同椰樹之後，都多左少少野睇，仲有蟹仔爬上樹上面添。

今日豪宅入面又多左一件寶物，就係依一間恐龍屋仔啦。依間屋仔仲係LULU妹送俾我，真係多謝晒呀！

放晒所有物品入豪宅，立即又再升級左咁，好豐富呀~

哈哈...蟹仔需要嘅野都應該齊晒(如果有乜漏左，就麻煩大家提吓我啦)，希望佢地鐘意依個新環境，多D爬嚟爬去，等我可以有得睇啦！

又嚟煮飯仔

依家先知道原來諗吓食乜餸嘅時候，都真係幾頭痛。

我都真係諗左好耐都唔知煮乜好，都係去到街市時先行左好耐，可以決定到煮乜。

唉....真係覺得D太太們好叻，每日都可以煮咁多唔同嘅餸，仲可以好快咁係街市買晒材料，真係要好好學習吓先得啦~

我行左成個街市四、五次，終於都買齊晒餸，返屋企煮飯仔啦！經過一輪努力，終於煮好我地個晚餐啦~

節瓜咸蛋湯

不過買多左節瓜，食唔晒，就因為咁俾大肥豬話我浪費呀！我下次會買少D啦～

蕃茄炒蛋

依個餸都唔係第一次煮，但我就覺得自己今次煮得幾好，個汁唔杰唔少剛剛好，哈哈～～進步中呀！

清蒸黃花魚

煮左咁多餐飯，我都係第二次蒸魚，因為成日都覺得洗魚個過程係好麻煩，我一路都怕怕，所以唔煮，不過因為今日諗唔到煮乜肉類，所以就大膽買左嚟試整。

雖然係洗嘅時候又真係幾多功夫，不過好在煮左出嚟幾好，條魚蒸得時間又剛剛好，都覺得自己好成功呀！哈哈～

連續煮左兩日飯，真係覺得自己識煮嘅野唔多，真係要俾心機學煮多D餸，等大肥豬多D新口味先得！

爬樹啦..

今日當我準備出門口返工時，竟然俾我見到依個奇景，有一隻蟹子爬左上樹訓覺呀！

見到嗰吓都真係好開心，即刻拎起部相機不停影呀！(好在今日早左起身，如果唔係咁影法一定遲到呀！)

其實...寄居蟹係好鐘意爬野，所以都係一件好普通嘅事，點解我話係奇景？

因為我依兩隻蟹仔都好懶惰，成日收埋自己係D沙堆入面，養左咁耐都好少見佢地四周圍爬，爬樹更加未見過啦！

但原來尋日朝早大肥豬都見到依一隻白色小蟹爬左上樹，但趕住番工關係，加上相機又係我度，所以冇影低俾我睇。

尋日都有少少失望，不過唔緊要，今朝俾我親眼見到，仲興奮呀！哈哈~~

如果可以成個爬樹過程都見到就好啦！我相信一定有依一個機會...哈哈！

豐富的晚餐 (已加入糖水食譜)

懶左好耐，今日都終於做番個好老婆，煮個好晚餐啦！

不過...今日我地個晚餐係三人套餐，因為LULU妹嚟左我地屋企食飯，順便探吓我D蟹仔。

為左準備今個晚餐，一放工就搭車返屋企附近個街市買餸。講起買餸，都幾頭痛呀！因為都唔知煮乜好，LULU妹只係話想食雞翼，其他就叫我諗。

諗左好耐，又行左好耐，終於都決定煮乜。買到大包細包咁，真係成個師奶仔咁呀！

一返到屋企就開始整餸，經過一輪大作戰，時間剛剛好，煮好晒嘅時候，LULU妹同大肥豬就返左嚟，開飯啦....兩餸一湯，都幾好呀！

LULU妹話要食嘅雞翼，因為佢未食過日式汁，所以就煮日式咖哩雞翼俾佢試。好在大家都話好味，大肥豬仲話煮日式咖哩最好係今次呀！

蠔油西生菜

冬瓜瘦肉湯(應該話冬瓜瘦肉薑湯，因為我落左好多薑呀)

可能今個晚餐預多左材料，所以由我原本都冇打算帶飯，到最後可以做到一個精美嘅LUNCH BOX俾我明天食呀！

食完晚飯，我又開始整第二樣野啦！

因為之後學校工友姐姐煮過一款糖水俾我地食，我就偷師番嚟打算有機會就煮。見今日LULU又係度，所以就煮左腐竹白果雞蛋糖水啦！

因為我都係第一次煲關係，所以都驚唔成功。好在，依個糖水都唔難整，所以煮出嚟都幾好，大家都話好味！

原來大肥豬係第一次食依款糖水，之前係完全未食過呀。

我自己就覺得好似落少左腐竹，好似唔夠奶白色。等我下次再整時留意吓先得。

不過我都當我自己成功左呀，又學識多一款糖水啦！

 

有朋友仔問我問煲依個糖水，所以就POST個食譜出嚟同大家分享吓啦~

材料：
腐竹　1 1/2 兩
白果連瞉　約 1/2 兩
水　1000 毫升
冰糖　80 克
雞蛋　4 個

作法：
1. 腐竹用水略為沖乾淨，瀝乾備用。
2. 將所有材質(除雞蛋)，用室溫水開始煲。(PS. 唔可以熱水，如果唔係唔會變奶白色呀！)
3. 煮 20 分鐘左右，加入冰糖煮溶。
4. 待糖水變奶白色後，將已烚好的雞蛋去殼，加入糖水中煮 3 分鐘。
5. 食得啦~~哈哈