奇妙王國

1 AUGUST 2014(FRI)

早前我係 MyBB.com.hk嘅FB抽中左兩張荒原創作嘅《奇妙王國》音樂劇，所以今早我又同小小豬拍拖去睇音樂劇啦~

其實小小豬都已經係第三次去睇音樂劇，第一次就係去睇啲小朋友唱歌跳舞(請按此)，可能小朋友都係表演緊小小豬成日唱嘅兒歌，所以小小豬都睇得非常投入。

第二次就係去睇睇兒童音樂劇(請按此)，有大肥豬之前嘅講故圖書打打底，加上表演者係扮演為小動物，所以小小豬都係順利好專心地睇晒全場。

到左今次，事前冇個故事嘅打底，加上啲歌小小豬之前都係未聽過，所以都曾經有一刻擔心小小豬可唔可以好安定嘅睇足全場。不過，自古成功在嘗試，所以我都唔理咁多，帶小小豬去睇~

原來今日依套係一個福音舞台劇嚟呀~

兩個靚靚花籃呀~

在場有個主角嘅公仔擺設，都幾得意呀！不過就只限佈置，唔可以買到，所以就借嚟影相留念啦~

時間剛剛好，嚟到等左一陣就可以入場啦~

小小豬又嚟扮型仔，睇吓本場刊先~

成套劇都真係唔錯，啲演員都好落力，帶出做人要有愛心、盼望同信心，遇到錯折都唔好放棄，只要心存信念，一定去到大家心目中嘅奇妙王國~

雖然小小豬都算睇得投入，仲識講問主角幾時先見到奇妙王子，不過由於轉換場景時，成個劇院就會轉晒黑。一向唔多怕黑嘅小小豬竟然會驚起來，所以每一次換場景佢都會孩埋嚟攬住我，攪到我件衫都俾佢整爛左，都真係唔知好嬲定好笑啦！

不過，係散場同演員影相時，有一個小插曲，令我都真係勁嬲！(我一向都好少講啲咁負能量嘅事，可知我當時係幾嬲呢！)

事緣結尾演員會出嚟同觀眾拍照留念時,，我就好有秩序地依照工作人員指示去排隊，正當我排到一半時，有一位贊助商嘅工作人員，好不客氣咁(仲掂住我隻手)，話我唔係佢地團隊嘅人，所以唔可以依家影相，要等佢地帶嚟嗰100位觀眾影完先到我地，叫我即刻離開排隊位。

當時我後面都只係有大約十數人，都唔知佢地啲100位觀眾係邊？

其實唔影相我都冇所謂，不過嗰那位女仕那麼不有善，係唔係贊助商就大晒呢？我都真係好嬲，所以即刻搵大會工作人員協助。

好在...大會負責人完全唔理佢係唔係贊助商，都同佢地講每個人想影都係要依序排隊，所以最後我同其他觀眾都可以排隊同劇中主角影相留念啦~

真係要俾個LIKE大會工作人員先得呀！

PS：由於我當時嬲嬲地，所以我即時係Facebook打文發洩一吓，發洩完都冇事。可能贊助商睇到我係FB發洩文，所以留言同我講唔好意思！其實我都幾驚訝，因為我都冇TAG佢地，點解佢地會睇到呢？不過唔理啦，我都好欣賞佢地即時作出嘅回應，希望佢地可以留意吓，唔好再發生依啲事啦！