光波綠茶芝士波波

16 AUGUST 2014(SAT)

一個作病的小朋友，一早起身又咳又變晒聲，所以全日都留係屋企休息冇得去街街，原定我地要去會展拎Q嘜親子廚神大賽嘅『網上最受歡迎Q嘜美食照』都冇得去呀！

其實小小豬都只係咳，其他一切都好咁精神，留係屋企都要整啲攪作嘛，所以就同小小豬一齊整綠茶味芝士波波啦~

芝士波波我地都成日整(請按此)，所以小小豬都已經係好熟識整嘅過程，不過加入綠茶味都係第一次。其實依個提意係嘉汶表妹講先，佢話坊間某麵包店有出過綠茶味芝士波波，所以我都打算試吓整唔整到啦！

今次小小豬好叻仔，基本上除左份量係我準備之外，全部過程都係佢負責呀！

先將100g糯米粉篩一次~

將半樽芝士粉倒入糯米粉內~

加1隻雞蛋攪勻~

加1茶匙牛油溶液~

再加入70ml牛奶~

最後加入綠茶粉，其實我都係估計份量，所以我今次用左1/4包左右啦~

之後就搓一陣，小小豬開頭都好抗拒，話隻手好皮污衊。不過搓搓吓又冇問題，仲越搓越開出力添呀~

搓到無粉粒，就可以用保鮮紙包好放雪櫃三十分鐘~

三十分鐘後，就可以拎出嚟搓成一粒粒嘅波波。依個環節亦都係小小豬最愛嘅一步驟，當啲麵團係泥膠咁呀~

小小豬搓波波嘅功力又進步了，雖然都仍然係大小不一，但起碼多左好多粒係圓形嘛...哈哈哈~

放入光波爐以一百八十度焗十八分鐘~

出爐啦~

整體上個賣相都尚算OK，口感方面同原味嘅都係一樣，不過味道方面就感覺上綠茶味唔太出，可能係我落得唔夠綠茶粉。我估下次落大半包嚟整一定會出好多，咁就仲好味呀！