We嘩！充氣嘉年華@奧海城

25 JULY 2014(FRI)

暑假真係造就左好多機會俾我同小小豬拍拖去街街，今日我地就係去We嘩！充氣嘉年華，等小小豬嚟個大放電啦！

坐住恐龍嘅小小豬係唔係好有型呢~

其實小小豬係復活節期間都去過參加We嘩！充氣嘉年華(請按此)，嗰次雖然係都係玩得開心，不過明顯就冇今次咁投入。因為今次我地大約三點半去到，一玩就玩到活動完結先離開，途中只係利用左大約45分鐘去食晚餐(可能在希望有得繼續玩嘅動力吓，小小豬今次食飯速度比平日快呀...哈哈哈)，我地都玩左差唔多四個幾鐘，小小豬都完全唔識攰，玩到最後一刻都唔願走呀！

真係要非常多謝公關姐姐嘅邀請，仲要多謝大仁叔叔幫忙，小小豬先有機會咁瘋狂去玩呀！

可能係平日再加上第一日嘅關係，所以人都唔算太多，不過小小豬係遠處見到啲充氣遊戲時，已經急不及特要去玩啦~

小小豬鐵人耐力賽就係由依個印仔開始~

睇吓有咩玩先~

估唔到小小豬第一個要玩嘅，就係全場最大嘅『變色龍世界』~

其實開頭我都有少少擔心，因為依個遊戲真係好大個，估計大約都有兩層樓高，加上我地家長又睇唔到入面嘅情況，所以都驚小小豬唔知係入面玩成點。

不過，原來我係唔洗擔心，因為小小豬一入到去之後，就已經一支箭咁跑入去跳跳跑跑，依依四分鐘時間都唔見佢出過嚟，走嘅時候又不停話要繼續玩，相信佢一定係入面玩得好興奮呀~

之後我地就轉玩『抓抓恐龍蛋』，同上次一樣小小豬都係入面玩到癲晒~

仲玩到唔肯出嚟添呀~

之後我地就去排隊玩『坐坐龍』，依個遊戲可以話係排得最耐嘅一個，我地足足排左四十五分鐘先到我地呀！

原本我都想叫小小豬玩住其他遊戲先，等少人啲先再嚟過。點知小小豬好堅持話想玩，仲話佢會乖乖排隊，所以就順佢意思啦~

正當我地排隊之際，我地見到恐龍BB係商場內同大小朋友一齊玩『捉依因』，不過我地當時都差唔多到我地，冇理由放棄排左咁耐嘅『坐坐龍』，所以都只能遠望啦~

玩左幾個動態遊戲，停一停玩啲靜態啲先，所以我地就去玩『造型流沙』。小小豬玩得都好投入，成日都話要整雪糕我食，依個為食豬真係玩住都係掛住食呀...哈哈哈~

我同小小豬嘅製成品，靚唔靚呢~

繼續靜態遊戲，我地就去做手工，今次冇大肥豬在場，原本我係打算整啲勁簡單嘅筆筒就算，點知小小豬堅持話想整小屋，仲話會自己整，咁我又試吓佢係唔係真係可以做到。

小小豬真係好專心咁整屋仔，只係較難嘅部分要我幫忙，其他簡單嘅真係一手一腳自己整，仲整得好專心添呀~

我地用差唔多一個鐘時間整手工，亦都俾機會我休息一吓。小小豬好努力下，終於完成啦~

再去做埋『神槍手』~

玩左幾個靜態遊戲，小小豬已經開始唔耐煩，要去玩『恐龍遊樂園』啦！上次小小豬唔多肯玩依個，就算玩都只係係上面行嚟行去。不過今次明顯好唔同，大膽左好多，係上面不停跳跳跳...又走嚟走去，玩得不知幾開心呀~

其實原本我都冇打算玩咁耐，都係打算玩個幾鐘之後就走，之後就去接大肥豬放工。不過小小豬實在玩得太開心，所以最後就到返大肥豬嚟接我地。

大肥豬嚟到真係非常合時，我地剛剛又開始玩『變色龍世界』，所以我就可以上二樓高處睇吓小小豬係入面玩成點。

原來入面條滑梯真係好高又快，小小豬仲可以完全唔驚，真係勁呀~

小小豬今日真係可以話係玩到傻左，因為佢玩左五次『變色龍世界』、四次『恐龍遊樂園』、三次『抓抓恐龍蛋』同『神槍手』、兩次『坐坐龍』同『造型流沙』，真係玩到連啲工作人員都認得佢啦！

玩左咁耐依個小小豬好似完全唔識攰，反而我只係陪排隊都攰到冇朋友，小朋友嘅精力真係唔可以睇少呀！

嚟緊8月暑假黄金檔期，「We嘩! 充氣嘉年華」將重臨東港城 ，今次仲會以「群馬」出動穿梭東港城，聽個名就知好厲害，希望到時都可以有機會再嚟大玩特玩啦！

 

More information :

We嘩!充氣嘉年華@奧海城【 與「龍」同行】
日期 ：7月25日至8月3日(共10天)
地址 ：奧海城2期地下主題中庭(香港西九龍海庭道18號)
時間 ：中午12時至晚上8時
遊戲票價 ：HK$10 ~ HK$50

 

Website：http://www.wewaland.com/OC-2014/
Facebook：https://www.facebook.com/WeWaLand