四歲生日好節目 - 虎豹夏日音樂節匯演

10 AUGUST 2014(SUN)

小小豬四歲生日節目可以話係音樂日，上午睇完節制輕快嘅Hi-5 SHOW之後(請按此)，接下來就係去聽啲古典音樂，因為大肥豬帶左我地去萃男書院葉傑全音樂廳舉行，去聽虎豹夏日音樂節匯演呀~

其實依一個節目早係兩個月前大肥豬係親子王雜誌見到有依個音樂節匯演，都已經好想帶小小豬去聽音樂。一嚟小小豬一向都好鐘意聽音樂，好想帶小小豬現場感受吓，等佢聽吓/睇吓現場演奏係點。二嚟咪就係因為個舉行地點，因為依間係大肥豬心目中嘅DREAM SCHOOL嚟呀！

好好彩我地可以向主辨單位拎到三張門票，所以小小豬生日活動又多一個有效益活動啦~

坦白講，我開頭都以為依個音樂匯演係啲柴娃娃節目，睇吓啲小朋友表演咁。不過原來我係大錯特錯，成個節目真係好嚴肅認真，以弦樂夏令營 – 韋華第《四季》為主題，成個樂場氣氛都真係好似去參觀大型演奏會咁，係會場真係講嘢大聲啲都唔可以呀~

哈哈哈...真係好認真呀，因為我地遲左少少去到會場，音樂會已經開始緊，所以我地要係門外等正在表演那一節完左先可以進場~

表演真係絕對唔係柴娃娃，因為係整個音樂匯演入面有好多唔同種類嘅表演，好似有小朋友為主嘅Do Re Mi小星星演出，香港少年中樂團，仲有溫哥華音樂學院克爾納四重奏與其學院「明日之星」四重奏，所以節目都好豐富呀~

係一個咁嚴肅嘅氣氛下，開頭我同大肥豬都好擔心小小豬會做出啲失禮情況，令到我地唔可以聽足全程。不過今日小小豬嘅表演真係令我地有點喜出望外，因為佢全程都好安靜留心咁聽音樂，最重要係佢平日都好鐘意講嘢，係嗰兩個鐘真係唔多點講，一心一意去聽音樂呀~

真係估依個小小豬唔到，佢投入程度真係比早上去睇Hi-5 SHOW時仲專心，佢真係眼定定咁望實啲演奏者，到完場時仲識得問我地嗰啲係咩樂器添。

可能我地每晚都俾小小豬聽住類似嘅音樂瞓覺，久而久之對古典音樂產生左喜好，所以咁鐘意聽啦！依個都係一件好事，因為聽多啲古典音樂，可以陶冶性情，對性急嘅小小豬嚟講都係一個好好嘅訓練。

既然小小豬咁鐘意聽，所以有機會都可以搵多啲同類活動俾佢參與吓，等佢睇多啲...聽多啲，話唔埋第日大個仔可以表演埋一份添呀！