真材實料香蕉糕

21 AUGUST 2014(THU)

我地又嚟親子廚房啦...今日嘅甜品就係....香蕉糕!!

雖然個賣相就差左啲啲，不過都好好味，軟綿綿又煙韌，最重要係我地用新鮮香蕉整，食得健康兼特別重香蕉味呀~

 

香蕉糕我都真係好鐘意食，不過係香港依家有好味嘅香蕉糕又真係買少見少啦！

早係大半年前係朋友仔FACEBOOK見到佢整左香蕉糕，仲用新鮮香蕉嚟整添，真係好吸引呀。嗰時我都已經好想跟風整埋一份，不過成日都冇的起心肝去齊買材料去整，終於趁依個暑假要搵啲攪作時，就同小小豬一齊買材料整啦~

在易潔鑊中開中火炒熟3湯匙糯米粉，炒約2分鐘後備用~

準備1.75杯糯米粉及半杯粘米粉~

要將依兩種粉過篩備用，當然又係小小豬出場時候啦~

將三隻香蕉壓爛~

之後將2/3杯熱水及1茶匙菜油加入香蕉蓉(其實原食譜係有加3/4杯糖，不過我俾小小豬食，所以冇加入糖，諗住健康啲嘛！)~

之後用攪拌器打至滑身~

之後就可以將已篩好的粉分4次加入香蕉蓉中~

在方形蒸盤上掃上一層少少嘅菜油，以防蒸好時黏住~

把香蕉糊過篩倒入蒸盤~

放入大滾的水中蒸20分鐘~

用小刀黏上菜油，之後就平均將香蕉糕切成條狀，蒸好嘅香蕉糕要放涼後先好切件，如果唔係就好難切啦~

之後沾上炒熟的糯米粉，就完成啦~

睇吓我個製成品，美觀度就差左少少，可能係因為我用左個長大蒸盤，所以比較薄身。SEND張相俾小豬媽睇時，佢仲笑住問我係唔係整左腸粉呀~

但其實薄有薄好，我覺得都幾靚呀...哈哈哈~

雖然係冇加糖，不過可能係用新鮮香蕉嚟整，所以都好香濃香蕉味，都食到啲甜品出嚟，小小豬都好鐘意食呀~

不過對大肥豬口味嚟講就淡左啲啲，冇辦法啦...依家整嘢食都係以小小豬為主，所以當然係就一就小小豬整淡啲，咁就食得健康啲嘛！

今次整完之後，等我物色個啱用嘅蒸盤，咁到時就可以整到一碟有色、香、味嘅真材實料香蕉糕啦！

椒鹽焗花竹大蝦

18 AUGUST 2014(MON)

依排啲花竹蝦應該係當造，今日行過街市又見到好多花竹蝦都大大隻脹卜卜，所以繼上次整左鹽焗花竹蝦之後(請按此)，今日又有新攪作，就係整椒鹽焗花竹蝦啦~

今次啲花竹蝦比上次買嘅時候又平左同大隻左，今次嘅花竹蝦都只係八十八蚊一斤，仲要隻隻都好大隻，所以就買左兩斤嚟整啦！

唔係講笑，啲花竹蝦真係仲長過我隻手呀~

簡單幾樣材料就可以開始煮啦~

首先清洗啲蝦剪去腳、鬚及挑腸備用~

用玫瑰露酒醃大約15分鐘，如果鍾意多啲酒香味，可加多小小酒嘅分量呀~

醃好之後就準備錫紙包蝦啦~

將啲花竹蝦一隻隻平鋪係錫紙上面，然後灑上椒鹽粉~

我個人覺得多啲椒鹽粉會好味啲，所以都灑左半支，做到每一隻花竹蝦面都有椒鹽粉呀~

之後就用錫紙包好~

將已包好嘅錫紙直接放入鑊用大火蒸大約八分鐘(記得隻鑊係唔落水呀)~

話咁快就可以食得啦~

簡單得嚟又好味，啲蝦大大隻都超級彈牙，最好就係勁多膏添呀~

不過依個做法我覺得都係好啱BBQ，搵機會去BBQ時都試吓用依個方法，我估用炭爐焗佢應該仲好味呀！(大件事.....諗諗吓攪到我都好想BBQ添。等秋涼嘅時候一定要去燒番轉先得呀！)

蠔油薑葱炆魚標

18 AUGUST 2014(MON)

小豬媽今日係街市買左一樣好特別嘅材料，我就係第一次食，不過又真係好正，依個就係蠔油薑葱炆魚標~

其實係街市都唔係好多機會買到魚標，小豬媽就煮過好幾次，但次次都撞唔啱我返屋企。撞啱今日行街市見到有好大碟，所以就買嚟煮俾我食啦！

唔好睇啲魚標個樣醜醜的，但其實係好有益，有好多骨膠原呀 ~

整依個蠔油薑葱炆魚標材料好簡單呀~

首先將啲薑去皮切片，葱就切段。因為我鐘意食葱，所以就加左好多呀~

開頭我都以為魚標好難洗，但其實係好易。只需要用水洗乾淨，之後用剪刀剪穿個泡泡~

將啲魚標汆水~

唔洗氽太耐，只需要等啲魚標缩細少少就可以啦~

之後就過一過冷河，就可以備用啦~

先爆香薑片及葱白~

加入魚標炒炒炒~

加少少蠔油~

再加入少少玫瑰露酒~

加少少水，蓋到一半魚標就可以啦~

焗佢大約十至十五分鐘~

最後加埋其他蔥段再炒炒炒，炒到啲蔥淋身就可以啦~

一碟好味又特別嘅蠔油薑葱炆魚標就完成啦~

依個真係好好食，真係食極唔停口。不過，魚標又真係幾難買，同小豬媽煮完之後都想再去買嚟煮都搵唔到，所以下次都唔知幾時先食到啦！