變形金剛澳門兩日一夜之旅 - PART 7

29 JUNE 2014(SUN)

終於嚟到我地變形金剛澳門兩日一夜之旅最後一個節目，就係去帶小小豬去威尼斯人®入面嘅PLAYHOUSE - Qube，等小小豬大放電呀~

睇完3D《變形金剛：殲滅世紀》之後，我地返去酒店收拾好行裝，同PR姐姐CHECK-OUT之後，又嚟我地嘅自由時間。

原本都打算出去氹仔市中心行吓食個晚飯就搭船回香港，不過見天氣唔係咁好，好似想落雨咁，加上我地又拎住大大小小嘅行李，所以最後都係決定留係威尼斯人®行吓啦！

既然仲有時間，叫小小豬乖乖陪我地SHOPPING佢又點會肯呀，所以我地都帶小小豬去Qube玩多一陣啦！

不過，原來澳門嘅PLAYHOUSE同香港唔同，唔係一個價錢任玩。坦白講....入去玩兩個鐘都要$110，其實又真係有點貴，不過依兩日澳門之旅小小豬都算乖，所以就當獎勵佢啦~

因為都係打算玩兩個鐘，我地都冇再加多一個大人費用，所以就係我同小小豬入去玩，大肥豬就帶埋啲行李係附近嘅餐廳休息一吓，到夠鐘就嚟接我地啦~

個百厭豬一見到啲設施就已經急不及待周去玩。先嚟玩啲小朋友遊戲，小型波波池同小型滑梯先~

依個大膽豬又點會咁心玩啲小朋友地區呀！見到旁邊啲大型迷宮，佢又要去玩埋一份呀~

其實係依個PLAYHOUSE都有啲大型嘅滑梯，不過嗰啲都真係幾高，所以都係俾啲大少少嘅小朋友玩。最後，都搵左一個長滑梯可以啱小小豬玩，但原來玩滑梯係需要著長衫長褲，我自己當然係冇帶嚟，雖然場內都有衣服免費外借，不過小小豬始終皮膚唔係咁好，所以開頭都唔想俾小小豬著。

不過，小小豬不斷游說我，見佢咁想玩又有誠意，最後都係同佢換上外借衣服，俾佢玩一陣啦~

其實條滑梯真係又長又高，依個大膽豬都真係完全唔驚，仲連續玩左五轉呀~

始終都係唔想著太耐啲長衫褲，所以玩左五轉之後就同小小豬換返衫，玩啲輕型遊戲休息一陣先~

休息過後當然又周圍爬啦~

由於場內都有好幾個出入位，加上又人在異地，所以都好唔放心俾小小豬自己一個去玩。所以全程我地係跟隨住小小豬，佢爬去邊我就跟到去邊，就係咁....我真的受傷了，扭親條腰....勁痛呀！

不過....見到個傻豬玩得不知幾興奮，左爬爬....右爬爬，仲做埋一個小小指揮官，話帶我去探險，所以就算整親都係覺得開心同值得呀！

原來兩個鐘時間就好快過，大肥豬嚟接我地走，之後就準備去碼頭搭船返香港啦！就係依個時候，我地三口子真係可以話遇到個貴人。

事緣PR姐姐為我地準備左晚上十一點嘅回港船飛，可以俾多啲時間我地留係澳門玩耐啲。不過因為帶住小小豬，所以我地都唔敢玩太耐，所以都打算早啲去碼頭排後補位。

正當我地等緊酒店穿梭巴去碼頭時，傾緊可唔可以排到後補位時，排係我地後面那位哥哥就問我地係唔係準備返香港，之後哥哥仲話佢有多三張即時船飛可以俾我地。

其實當初我地都有少少疑惑，不過哥哥話只係見我地帶住個小朋友，唔好辛苦去排啦，佢又完全冇叫我地俾錢，加上又真係好驚排唔到後補位，最後，我地係接受左哥哥嘅好意啦！

就係咁，我地唔洗排後補位，就可以搭到即時開出嘅船返香港啦！

嘩....原來哥哥俾我地嘅係頭等船飛，所以我地真係勁好彩，可以早返香港之餘，仲可以坐得舒舒服服呀~

我都係第一次搭頭等位，原來有飲品同小食提供呀~

玩左成日嘅小小豬都唔覺攰，仲係船上面塗顏色呀~

返到嚟香港，即係我地變形金剛澳門兩日一夜之旅就完成啦！

依兩日真係玩得好開心，尤其係小小豬，佢返到屋企都仲問緊我幾時再帶佢去酒店，幾時再去旅行，幾時再去玩過，睇嚟小小豬真係好鐘意去旅行，希望好快又有機會帶佢去玩吓啦！

再一次多謝PR姐姐邀請，我地三口子真係玩得好開心呀！