23 JULY 2014(WED)
今日我地兩母子又嚟拍拖入迪迪尼啦，印象中好似係第一次相母子係城堡下留倩影哦~
其實今日入園玩都係其次，今日最主要係同好友入迪士尼酒店歎HIGH-TEA慶祝好友嘅生日。因為未夠鐘，所以我地兩母子就先入園行一個轉先。
不過唔知係唔係暑假關係，周圍都係好多人，加上天氣又熱到冇朋友，為免小小豬太快玩到冇能量，所以都係入去SHOP行吓，涼吓冷氣先~
等埋好友嚟到，我地就轉戰迪士尼酒店歎HIGH-TEA啦！因為好友係有金咭，生日月可以有買一送一優惠，所以就可以約埋我一齊嚟食啦~
職員姐姐好好人，一早為小小豬準備左兒童套裝呀~
等左一陣，我地嘅HIGH-TAE嚟啦！
先嚟我地嘅飲品先~
再嚟好靚嘅HIGH-TAE小食~
每一層嘅食物都好精緻呀~
依個為食小小豬真係老實不客氣，一見到個士多啤梨馬卡龍就即刻拎嚟食，仲好似好滋味咁哦~
對上一次入嚟迪迪尼酒店食HIGH-TEA時，就係我仲有金咭嘅生日月(請按此)。不過原來時隔差唔多一年，依家依個HIGH-TEASET都已經有唔同，除左有一層層嘅小食之外，仲有主菜添呀~
我地食飽飽之後，原本小小豬好想落酒店下面個大迷宮玩(可以佢記上次嚟時玩得好興奮啦)，不過我實在唔夠氣力同佢追逐，所以都係等下次大肥豬一齊時等佢地兩父子跑跑跑啦！
之後我地一行三人就再入迪迪尼繼續玩，行過見到史迪仔，小小豬都好似未同過佢玩，加上又唔多人排隊，所以我地又嚟影啦！
唔知點解小小豬見到史迪仔會咁興奮，全程笑到傻咁影呀~
之後行入幻想花園，今次都我勁興奮，因為見到我好耐冇見嘅MARIE呀~
WOW.....我至愛嘅MARIE呀!!!! 冇見佢都大大話話有四年多啦，今日再可以同佢玩，你話我點可以唔興奮呀！
非常感謝在場嘅攝影師哥哥，佢幫我地影左好多張相，唔同角度唔同位置都有影，仲好用心咁幫我引小小豬(最重要係用我部機嘅時候都好落力)，依家係樂園可以搵到一個咁好嘅攝影師哥哥，真係唔易呀~
超級鐘意依張相，攝影師哥哥真係好捉到嗰一刻，真係要俾個"LIKE"佢呀~
咁耐冇見，我又點可以放過依個機會呢！所以先將小小豬交俾好友睇住，我自己同MARIE影返夠本先~
我真係好唔想咁快就離開依個亭，因為唔知下次幾時先可以再見到MARIE。不過，其實我地比其實人都影耐左，所以唔可以咁貪心影響其他朋友，唯有勁唔捨得嘅情況下同MARIE講拜拜啦！
原本我地都好想影MICKEY，不過又真係多人得恐怖，要排成60分鐘以上，所以我地就轉向同PLUTO影啦~
影完相之後，由於好友仲有下場節目，所以佢就先離開樂園，我地兩母子又繼續玩。
接下來又到小小豬指定玩樂時間，佢第一個主力就係佢次次嚟都一定要去嘅小小世界~
當我地行出嚟時見到汽球哥哥，估唔到小小豬如此大膽走去問哥哥可唔可以送一個汽球俾佢，就係咁哥哥就即場整左直昇機俾小小豬啦~
之後就到玩我最怕嘅遊戲 - 轉轉杯，其實我真係唔明白點解小小豬玩依個係唔會暈，當我轉左第四吓之後，我都已經開始覺得暈暈地，反而小小豬仲好精神咁周圍望~
原來之後小小豬話想去玩水，不過見在場已經有好多強國嘅小朋友，我唔係因為見強國小朋友就唔俾小小豬一齊玩。只係佢地玩得都真係幾粗魯，見有啲好大個嘅小朋友不停向細小嘅潑水(仲要係好密集式咁潑)，為免小小豬受傷害，所以都唔俾佢玩啦！
之後我地就轉玩巴士光年啦~
仲去玩埋飛碟添~
其實今日真係冇預計係咁夜走，不過因為小小豬玩到唔願走，大肥豬又話見佢玩得咁興奮就俾佢玩耐啲，所以最後我地兩個留係樂園食埋晚餐8:30先離開，真係最夜嘅一次呀~
大肥豬驚個寶貝仔玩到咁夜會攰，所以放工返左屋企之後都再出門口，去荔景站接我地，最重要係全程抱住寶貝仔，真係廿四孝DADDY~
好友剛剛外遊返嚟，仲送俾我同小小豬準備左韓國手信...多謝呀~
今日玩得超開心，又食左一個豐富HIGH-TEA，真係勁滿足嘅一天呀！
