專心

5 FEBRUARY 2012(SUN)

哈哈..其實係個POST應該係新年前出，不過因為條片係小豬媽手機度，所以到今日先可以同大家分享。

話說之前係宜家買左啲刀、叉..嘅進餐工具，話想訓練小小豬乖乖咁自己食嘢。 買左之後，我地同小豬媽都KEEP住有教佢用，有時俾啲生果，有時就俾啲飯仔，都算識用啦，不過仍然未可以自己好斯文咁食，次次食到一半就要用手拎啲食物(可能用手食會快啲..因為小小豬真係一名為食豬嚟呀)，仲要食到成面成咀都係，有時都真係既激C又笑C呀！
 
不過唔緊要，慢慢嚟啦，相信我地慢慢KEEP住訓練，總會成功呀！ 不過係新年前，當小豬媽俾啲星星餅俾小小豬當獎勵時(據了解係因為小小豬好乖咁自己執返晒啲玩具，所以有獎賞)，小小豬自己去拎支叉仔去拮啲星星餅，小豬媽就拍低俾我睇~
嘩.....依個小小豬真係好專心咁拮啲星星餅(睇見佢咁專心個樣..好有感觸添)，當佢成功拮住嚟食個樣又真係好攪笑又得戚。

條短片除左俾我覺得小小豬好專心之外，我亦都覺得佢唔係一個貪心嘅BB，因為當佢拮到兩粒之後，佢唔會放晒入口，將另一粒放返入碗仔度，真係好GOOD BOY呀！

希望小小豬可以KEEP住咁，到大個都係做一個專心又唔貪心嘅GOOD BOY啦！