成日聽朋友講東涌個OUTLET好多嘢買，最重要係好多平嘢執。不過東涌對於我嚟
講又真係遠左啲啲，所以想去見識下OUTLET威力都冇機會。
終於都有機會了，因為杏花新城經過翻新後，係東翼一樓變成「勁、型運動區」專區，有好多間知名運動品牌店鋪，每間都有大型優惠同精選特價貨，實行打造成東區OUTLET~
運動服裝其實我都真係唔多識，不過有得八卦我又點會放過機會，再加上兩位老細都想買運動鞋，所以我就嚟做個先頭步隊，睇下有咩平嘢先啦！
第一站就先去Adidas~
店內都有好多男女裝運鞋款，一般都係7折起，有部分精選貨品買3件再8折。不過我嘅著眼點就當然係童裝，好多童裝鞋款都係二百蚊左右~
另外童運動衫都係唔洗一百蚊一件，又好似抵哦~
之後我地就去Under Armour參觀，依間亦係Under Armour全港唯一一間Outlet呀~
不過入面就以女裝運動服為主，不過就超抵，大約二百幾蚊就可以買到來自美國嘅運動鞋，但大多數都係斷碼，所以就要花少少心思睇下買唔買到心頭好啦~
接下來就入New Balance店參觀~
店內都有好多童鞋做特價，平均都係二百至三百蚊左右啦~
男裝鞋都好吸引，大部分都底至半價~
來自英國及美國嘅靚鞋都一樣特價呀~
Converse鞋可以話係我至愛，成日都好想買對同小小豬嚟個親子裝，唔知今次又睇唔睇中呢~
童裝都大約係二百左右，款式唔可以話係好多，不過今日眼見到仲有好多碼，應該都可以買到平價~
成人鞋都一樣有好多選擇，一般都係六折左右啦~
Ipanema係全港首間專賣店~
大部分拖鞋及涼鞋款全場7折，有少量更是半價。啲鞋仔都幾得意，百零蚊就買都抵抵地啦~
SKECHERS嘅閃閃鞋當然又點可以缺少~
買平唔洗一百蚊就可以買到閃閃鞋，真係抵到唔識形容，只怪小小豬係男仔，唔可以著到~
不過都有啲大少少嘅鞋，每對都係三百蚊內可以成交~
最後就以專賣行山設備嘅FREE RUNNING PRO~
店內大部分行山設備都有特價，當然唔少得運動鞋，就連最新款都可以係依度搵到，雖然未做到半價咁著數，不過以新款嚟計都叫做好優惠價啦~
當中都有一個童裝部~
哈哈哈...我已經為小小豬睇中幾對型鞋啦~
唔覺唔覺我就行左個幾鐘，如果唔係要趕返去接小小豬放學，我想我都仲可以行多幾間，計劃下買咩型鞋俾佢呀！
不過唔緊要，我地嚟杏花新地都好方便，地鐡一出就有得行街，行到攰又可以去餐廳食飽飽再行過。所以話...唔怕你行得攰，只怕你會大出血呀....哈哈哈！
More Information：
杏花新城「勁、型運動區」
地址：杏花新城東翼1樓
營業時間：11am-10pm
查詢：2595 1978
Facebook：https://www.facebook.com/mtrmallspm/
**我地的FACEBOOK PAGE，齊齊來交流親子。育兒。烹飪啦**
沒有留言:
發佈留言