【補血養顏】桑椹杞子圓肉茶

28 SEPTEMBER 2016(WED)

平日煲嘅涼茶都係以屋企兩位老細為主，不過...間唔中都要為自已打算下，煲啲啱女性飲嘅茶好好滋潤下嘛！

依個茶係我之前係藥材店買材料時店主介紹我煲，話可以有助補血養顏。一聽到話補血養顏緊係好有興趣，所以就即刻執齊材料煲依個桑椹杞子圓肉茶啦~

 

桑椹佢嘅功效同紅棗差唔多，一樣係滋陰補血同埋補肝益腎，而且補而不燥，所以如果連紅棗都唔飲得嘅人仕，都可以考慮試下桑椹。桑椹係一般藥房都可以買到，而且一両大大包都只係八蚊左右，仲可以分好多次用添呀~ 

 

料料有：桑椹、杞子、圓肉各1湯匙及蜜棗1粒~ 

 

將所有材料用清水浸洗~

 

部份桑椹會有啲小枝，所以記得要浸洗前要剪走先呀~ 

 

煲內放6碗水~ 

 

然後加入所有材料~

 

待滾起後，用大火加蓋煲約15分鐘~ 

 

再轉慢火加蓋煲多30分鐘~ 

 

最後焗多10分鐘，之後開蓋隔渣，就飲得啦~ 

 
依個份量就大約可以煲到有4杯，夠我一個人飲大半日。比起之前用紅棗茶，明顯味道就淡少少，反而我就幾鐘意依個味，清清地可以飲多幾杯，對於我依一個唔鐘意飲水嘅人，真係幾啱飲呀！ 

有安神嘅圓肉，同埋明目杞子，再加埋補血嘅桑椹，所以都真係好啱女性，尤其係生理周期完左之後，都可以煲依個茶作為調理身體呀！


溫馨提示：由於材料都涉及藥材成分，所以係好因應個人體質，大家記得煲之前了解下自己，或者問下相熟中醫/藥材店職員，呢個湯料啱唔啱自己呀！

**我地的FACEBOOK PAGE，齊齊來交流親子。育兒。烹飪啦**