【清心潤肺】雙耳木瓜湯

18 SEPTEMBER 2016(SUN)

慢慢開始感受到秋天嘅氣味，趁天氣仲未乾燥時就一定要打好個底，所以就要煲定啲滋潤嘅湯，就係咁我煲左個雙耳木瓜湯俾兩位老細飲啦~
 
今次主角除左係木瓜之外，就係雙耳，咁咩係雙耳呢？咪就係雪耳同埋黑木耳。雪耳係好滋潤我估大家都應該知道，原來黑木耳當中富含膠質，可以滋養肌膚，使皮膚變的光澤有彈性。所以話次依個湯就可以清心潤肺同埋滋潤肌膚，所以話仲唔係大人同小朋友都啱飲！

材料都係好簡單，包括有木瓜1個、百合及白蓮子各1兩、無花果5粒、雪耳及黑木耳各1兩及豬肉約$40~ 

   

白蓮子要留意一下中間有冇芯(基本上大多數都已經冇左，十粒有幾粒仲有咁啦)，如果仲有的話就一定要除走，如果唔係個湯就會帶點苦啦~

 

木瓜去皮去籽及切小塊備用；瘦肉洗淨汆水~

 

雪耳及黑木耳清水浸泡至軟，撕成小片；無花果及百合白蓮子浸洗~ 

 

煲內放約4L水，然後隨水加入所有材料(木瓜除外)~

 

待滾起時，用大火加蓋煲約30分鐘~

 

然係加入木瓜~ 

 

再轉慢火加蓋煲多1小時~ 

 

最後加適量鹽調味，就飲得啦~

 

啖湯好清甜，有木瓜又有雪耳，可以話啱晒小小豬，佢都不知幾鐘意，絕對係又飲又食，仲唔係即刻滋潤晒~

 
不過長氣啲都要再提，雖然雪耳係好味又有益，不過都要再提多大家煲過嘅雪耳一定要即日食/飲晒，如果隔夜，經過一夜嘅浸透，佢就會放出一啲有害物，到時就有益變有害啦！
 
溫馨提示：由於材料都涉及藥材成分，所以係好因應個人體質，大家記得煲之前了解下自己，或者問下相熟中醫/藥材店職員，睇下呢個湯水啱唔啱自己呀！

**我地的FACEBOOK PAGE，齊齊來交流親子。育兒。烹飪啦**