玩左好幾日，係時候要做返個好媽媽，煮返餐好餸俾我家兩位老細。
今日就懶懶地唔去行街市，改去超市買餸，因為小小豬話想食粉絲同三文魚，所以就試下整依個蒜蓉粉絲蒸三文魚，一次過滿足晒佢啦~
其實依個餸我都係有點亂咁整，唔知成唔成功呀，不過自古成功在嘗試，所以就放膽一試啦！
材料有三文魚腩一片、蒜頭半粒、粉絲一小包及照燒汁~
粉絲浸軟備用；蒜頭啄成蒜蓉~
將一半嘅蒜蓉、約三分一包照燒汁及少少鹽加入粉絲內~
最好醃半小時以上，等粉絲可以入味啲~
將餘下嘅照燒汁塗上三文魚醃約十五分鐘~
然後先將粉絲墊底，然後鋪上三文魚，最後再放多少少蒜蓉~
鑊內加入水，待水滾後蒸十分鐘~
話咁快就食得啦~
第一次煮又好似唔差，照燒汁同三文魚又好似幾夾，啲粉絲又入晒味，今次真係可以話係唔打唔撞之下成功，滿足感真係爆晒呀！
**我地的FACEBOOK PAGE，齊齊來交流親子。育兒。烹飪啦**
沒有留言:
發佈留言