淮山杞子螺頭煲雞湯

26 JANUARY 2016(TUE)
依排天氣凍凍地，最啱緊係飲啲滋補湯。剛好托好友買左啲靚靚螺頭，所以就煲返個淮山杞子螺頭煲雞湯啦~


其實我都真係好少煲雞湯，加啲中藥材都係唔多。我唔係唔想煲，只係小小豬鐘意飲啲雪耳...紅蘿蔔嗰啲湯多啲，所以我就迎合下佢，煲多啲佢鐘意飲嘅湯。
但....啲中藥材湯都有佢嘅好處，就好似淮山係健脾開胃，螺頭有可以滋陰清熱，加埋一齊煲就真係一家大細都啱飲，所以就決定煲下啦！
竹絲雞一隻、瘦肉約$20、乾螺頭約十粒、淮山一両、杞子一湯匙、紅棗六粒、元肉一湯匙、果皮一角~

由於我係用乾螺頭，所以就要浸大約六小時，等佢浸至軟身~

果皮浸透去囊，紅棗切片去核，連同其他藥材浸洗~

竹絲雞及瘦肉洗淨汆水備用，雖然今次主要係煲雞湯，不過都係要加少少瘦肉一齊煲，咁啖湯就會甜好多呀~

煲內放約1.5L水，然後加入果皮~

待水滾後加入所有材料，用大火煲半小時~

之後就轉用慢火煲約2.5小時~

最後加少少鹽調味就飲得啦~
哈哈哈...我今次真係勁夠火喉，因為隻竹絲雞同淮山都俾我煲都溶晒，加埋啲螺頭鮮甜味，啖湯真係勁甜超好飲，我自己都飲左三大碗，老公仲叫我下次再煲過依款湯添。
其實煮飯煲湯最開心就係有人欣賞(當然我都成日有失敗嘅戰績)，見佢地食得開心之餘又快快口幫我清晒啲湯/餸，又真係幾有滿足感，亦都係我嘅動力繼續為佢地努力做好依個女煮人呀！

**我地嘅FACEBOOK FAGE，唔知大家LIKE左未呢？**小小豬的成長日誌
大家一齊嚟交流下煮飯仔及去玩嘅親子樂啦！