木瓜雪耳瘦肉湯

28 DECEMBER 2015(MON)

早幾日入大伯屋企食飯時，見到佢有新鮮樹上摘嘅木瓜，我當然唔執輸帶左兩個返屋企，所以今日就嚟煲木瓜雪耳瘦肉湯，等我地三口子齊齊潤一潤啦~

睇住大伯由木瓜樹上摘落嚟，咁新鮮就當然要即刻煲左佢啦~

其實木瓜同雪耳真係最佳配合，佢地兩者加埋真係既好味又滋潤，我自己都用過唔同材料煲過，今次就用屋企現有嘅材料，簡單煲一煲啦！

木瓜兩個(由於我依兩個新鮮木瓜較細，所以用兩個，如果大大地嘅一個都夠呀)、雪耳一朵、無花果六粒、南北杏約一湯匙、豬肉眼瘦肉約$30~

木瓜去皮去核之後切塊，切嘅時候最好就切大件啲，如果唔係煲完之後會冇得食木瓜呀~

雪耳浸軟後去蒂，無花果剪開一半~

豬肉眼瘦肉洗淨汆水，我煲湯習慣係用豬肉眼，因為用豬骨就會比較燥，如果用豬展煲出嚟嘅湯係會有少少肥，所以用豬肉眼就最好，甜得嚟又冇咁肥，所以就最啱我口味~

煲內放約1.5L水，然後加入所有材料(木瓜除外)~

待水滾後再將木瓜加入，之後轉小火煲一小時~

最後加少少鹽，咁就飲得啦~

哈哈哈...湯料又可以食埋，新鮮樹上摘真係唔同啲，木瓜真係超甜超好味呀~

小小豬就對雪耳有興趣啲，可能佢仲記得我講過食左雪耳會靚仔，所以佢真係密密食...密密飲呀~

雖然雪耳係好味又有益，不過都要再提多大家煲過嘅雪耳一定要即日食/飲晒，如果隔夜，經過一夜嘅浸透，佢就會放出一啲有害物，到時就有益變有害啦！   

 

 

**我地嘅FACEBOOK FAGE，唔知大家LIKE左未呢？**
小小豬的成長日誌
大家一齊嚟交流下煮飯仔及去玩嘅親子樂啦！