極速狂跳彈彈床

27 JANUARY 2016(WED)

小小豬一向都冇時停，最鐘意就係彈彈下，平日係屋企當然唔可以俾佢係張床做依件事，所以一有機會去到酒店依隻百厭豬就會跳不停就。

SY哥哥相約小小豬齊齊去BOUNCE跳彈床，貪玩嘅我地就當然想去玩啦，所以就請齊齊去跳餐飽啦~

點解唔見小小豬？原來因為3歲以上而不足110cm嘅小朋友係唔可以玩夜場，小小豬仲試3cm先夠，原來都想博一博，不過又怕博唔成功之後，小小豬知道冇得入去玩會扭計唔開心，所以最後都係決定我自己去玩一轉，等我放一放電啦！ 

入場後需要換上場內指定嘅安全襪先可以入內跳跳跳呀~

整個場內分為五個區別，每一個玩嘅都有啲唔同，當然....都係以彈床為主。每個區域都有負責職員係門口睇住，強烈監視每格彈床只可以一個人跳呀！ 

我地第一個就係自由彈跳場地~

睇個名都知係入去彈床上不停任跳啦~

係旁邊嘅彈床仲可以好似瀡滑梯咁，瀡落彈床之後又可以再彈過，真係勁興奮呀~

真係年紀大，彈左一陣都已經好攰，已經唔識郁啦~

雖然係有啲攰，不過玩係唔可以俾佢停，我地轉場去玩閃避球~

依個真係超好玩，邊跳彈床又玩閃避球，真係好玩都極點。依個時候真係勁掛住小小豬，因為佢一定會好鐘意玩依個GAME呀~

接住就嚟SLAM DUNK入樽~

哈哈哈...跳住嚟入樽，當然我都係唔成功，不過都叫做入到籃，都冇失威啦~

我地玩左三個區域之後，原來都差唔多夠鐘去開餐。場內仲有兩個場，不過都係俾啲專家玩，我地依啲初哥都唔好去獻醜了~

跳左差唔多個半鐘，玩到攰時又真係有啲肚餓，依個時候食個熱騰騰嘅盤菜就啱晒~

做左超大量運動後，真係特別好味，我地個個地食到飽飽，個盤菜仲有一大半，個盤菜份量又真係幾足料哦~

又食又玩咁過左一個愉快晚上，唯一美中不足就係小小豬冇嚟同我地一齊玩，如果佢係度一定會好開心勁興奮呀。

睇下嚟緊睇下就唔就到時間帶佢嚟玩日場，等佢跳餐飽先得！

**我地嘅FACEBOOK FAGE，唔知大家LIKE左未呢？**
小小豬的成長日誌
大家一齊嚟交流下煮飯仔及去玩嘅親子樂啦！