青紅蘿蔔印度椰子瘦肉湯

18 JANUARY 2016(MON)
嗰日係果欄買印度椰子時，店長姐姐俾左幾個印度椰子嘅湯水食譜俾我，既然買左咁多粒返屋企，緊係密密煲佢唔好浪費嘛，所以就買齊材料，煲返個青紅蘿蔔印度椰子瘦肉湯潤返下先得~



青紅蘿蔔湯我就成日都煲(按此重溫)，因為老公係好鐘意飲依個湯，作為一名間歇性嘅賢妻，有時候都係要投其所好嘛！
青紅蘿蔔再加埋印度椰子會係啲咩味？青蘿蔔本身個味都係幾濃，一齊煲又會唔會蓋晒印度椰子？我真係滿腦子疑問。
不過....自故成功在嘗試，再加上店員姐姐俾得我都應該係信得過，所以就唔理咁多，買齊材料試下啦！
材料包括有印度椰子一粒、紅蘿蔔及青蘿蔔各一條、豬肉眼約$40、南北杏約一湯匙~

先將印度椰子切片，青紅蘿蔔切塊~

洗乾淨南北杏，瘦肉洗淨汆水備用~

煲內放約1.5L水(約有15個飯碗左右啦)，然後隨水將所有材料加入~

待水滾後慢火煲約2小時~

最後加少少鹽調味就飲得啦(由於青蘿蔔本身都係濃味，所以真係唔洗落太多鹽呀)~

其實我都有一刻擔心個青蘿蔔味會蓋晒印度椰子，但一飲落又即刻解除左我個擔心，原來佢地兩個係好夾嘅朋友嚟，啖湯除左有好香嘅椰子味之餘，都仲有青蘿蔔獨有嘅甜味，總之都係嗰句：好好飲呀！(哈哈哈...又有人唔知醜....自己讚自己啲湯！)

**我地嘅FACEBOOK FAGE，唔知大家LIKE左未呢？**小小豬的成長日誌
大家一齊嚟交流下煮飯仔及去玩嘅親子樂啦！