炒雪糕@Spade by Lassana

31 JANUARY 2016(SUN)
落雨天真係咩地方都去唔到，但又唔想困係屋企一整日，所以就近近地去行大本型。估唔到就係咁益左小小豬，因為有靚靚炒雪糕呀~

奇幻三部曲 - 首部曲中國神話

29 JANUARY 2016(FRI)
今日真係極度滿足到我依個影相控，多謝香港3D奇幻世界邀請，等我可以參加奇幻三部曲之首部曲 - 中國神話開幕禮，一次過同好多Sanrio朋友齊齊影相呀~

極速狂跳彈彈床

27 JANUARY 2016(WED)

小小豬一向都冇時停，最鐘意就係彈彈下，平日係屋企當然唔可以俾佢係張床做依件事，所以一有機會去到酒店依隻百厭豬就會跳不停就。

SY哥哥相約小小豬齊齊去BOUNCE跳彈床，貪玩嘅我地就當然想去玩啦，所以就請齊齊去跳餐飽啦~

韓國秋冬養生食療

27 JANUARY 2016(WED)
今日我依個偽大廚又去進修一下我嘅BB班廚藝，去參加由KC Korea同韓印紅舉行嘅韓國秋冬養生食療活動~

淮山杞子螺頭煲雞湯

26 JANUARY 2016(TUE)
依排天氣凍凍地，最啱緊係飲啲滋補湯。剛好托好友買左啲靚靚螺頭，所以就煲返個淮山杞子螺頭煲雞湯啦~

泰拳館？拳王泰國餐廳

25 JANUARY 2016(MON)
卡通人物為主題嘅餐廳我就去過幾間，朋友仔係網上發現係銅鑼灣開左一間以泰拳為主題嘅泰國餐廳，相約齊齊去食餐飽又吹吹水。哈哈...有得去玩我當然樂意奉陪，所以今日又同大老細請假去輕鬆一晚啦~

甜蜜蜜...西洋菜蜜

24 JANUARY 2016(SUN)
今日又學人煲新嘢，依個亦都可以話係有啲童年回憶嘅飲品，就係西洋菜蜜啦~

櫻花水信玄餅

23 JANUARY 2016(SAT)
今日行上海街時終於俾我買到個波波粒冰格，所以就同小小豬一齊我想整好耐嘅櫻花水信玄餅嚟做我地嘅飯後甜品啦~

勁失望的壹．咖啡店

23 JANUARY 2016(SAT)
依幾個星期小小豬都要去油麻地上興趣班，一上就嚟個半鐘，天寒地凍緊係唔好係街流連，所以就近近地係附近嘅餐廳食個下午茶餐啦~

桑寄生蓮子紅棗茶

22 JANUARY 2016(FRI)
大家千其唔好俾我今日煲嘅嘢嚇親，桑寄生係對孕媽媽好好，我記得生完小小豬嗰幾日，老公都煲嚟醫院俾我當水飲。
當然今次煲一定唔係依個原因，因為桑寄生都仲有好多好處，冬天喝一碗桑寄生茶，可以行氣活血同滋陰養顏。所以趁今日凍凍地，煲桑寄生蓮子紅棗茶等自己暖暖身最重要~

椰汁桃膠西米露

20 JANUARY 2016(WED)
既然咁辛苦先買到桃膠，緊係唔好浪費，煲多啲等自己潤多啲嘛。係網上見到食個椰汁桃膠西米露嘅做法，見到好似幾簡單，加埋我又係一名椰子控，所以又嚟試下啦~

情侶檔比卡超同你齊賀年@MIKIKI

19 JANUARY 2016(TUE)
今日帶左小小豬返學之後，我就快速咁飛去MIKIKI，因為有三位朋友仔等緊我呀~

青紅蘿蔔印度椰子瘦肉湯

18 JANUARY 2016(MON)
嗰日係果欄買印度椰子時，店長姐姐俾左幾個印度椰子嘅湯水食譜俾我，既然買左咁多粒返屋企，緊係密密煲佢唔好浪費嘛，所以就買齊材料，煲返個青紅蘿蔔印度椰子瘦肉湯潤返下先得~

體操初體驗

17 JANUARY 2016(SUN)
天氣唔好真係邊度都冇得去，唔多願留係屋企嘅兩母子，幾經辛苦終於說服老公，帶我地近近地去一轉MEGA BOX行下。就係依一個唔覺意，小小豬又有一個新體驗，去體操初體驗呀~

蘋果桂圓燉桃膠

16 JANUARY 2016(SAT)
依排係FB啲煮食版都俾桃膠洗版，又平又滋補嘅嘢當然係勁想試，不過搵左好耐都買唔到，終於今日行過俾我買到啦！
第一次試整都唔打算太花巧，利用屋企嘅現有材料，整依個蘋果桂圓燉桃膠啦~

印度椰子栗子瘦肉湯

9 JANUARY 2016(SAT)
早係幾個月前煲過印度椰子清潤湯之後(按此重溫)，真心覺得係好飲，所以成日都想買嚟再煲過。終於我今日買到又平又靚嘅印度椰子，所以就即刻去買材料，煲依個印度椰子栗子瘦肉湯啦~

澳門親子之旅：華納滿Fun童樂園

5 JANUARY 2016(TUE)

我地食飽飽之後小小豬就抱住極度心急又興奮心情，因為可以去華納滿Fun童樂園大放電呀~

澳門親子之旅：新濠影匯 + LUNCH BUFFET

5 JANUARY 2016(TUE)

瞓醒之後，我地就當然唔好浪費時間，落酒店周圍行下啦~

 嘩...八字摩天輪呀，我地原本都好想豪豪地去坐一轉，不過.....天氣真係唔係咁好，既有毛毛雨之餘，整個環境都好濛，所以最後老公都話，既然上到去都係睇唔到風景，都冇左個意義係度，不如.....我地將啲摩天輪費用留嚟食餐好仲好，所以我地都又嚟影左當搭左啦！

澳門親子之旅：大三巴+ 豐富晚餐 + 新濠影匯

4 JANUARY 2016(MON)

我地係科學館開心玩樂之後(按此重溫)，我地就出發去大三巴匯合小小豬舅父仔去食晚餐。

去到大三巴第一個目的地就當然係我恨嚟好耐嘅HELLO KITTY專門店啦~

澳門親子之旅：暢玩澳門科學館

4 JANUARY 2016(MON)
難得舅父幫小小豬搵到勁優惠嘅酒店等佢可以去跳床，所以我地就偷雞放多兩日去渡假啦！(我地返左四年學都係第一次，所以都唔係好過分啫...哈哈哈)~

稻香飲食文化博物館

3 JANUARY 2016(SUN)
稻香飲食文化博物館之前成日聽朋友話好好玩，尤其係啲像真度勁似嘅擺設，真係好想帶小小豬去玩一轉呀！
終於趁依個聖誕節假，約埋好友魚子媽，齊齊嚟玩一轉啦~

杞子圓肉菊花茶

2 JANUARY 2016(SAT)
早幾日去藥材店買材料煲蘆根薏米雪梨水時(按此重溫)，我都買左少少菊花諗住煲小小豬至愛嘅菊花茶。店員就教我加埋杞子同圓肉一齊煲，可以好味啲之餘又可以對眼晴好，所以就嚟煲依個杞子圓肉菊花茶啦~

自家制 - 神奇冷靜樽

2 JANUARY 2016(SAT)
前幾日唔覺意睇到有個網站教整神奇冷靜樽，睇落又幾啱小小豬用，見屋企又有齊依啲簡單材料，所以就嚟同小小豬整返個嚟訓練/玩下啦~

蠔油冬菇炆鵝掌亦

1 JANUARY 2016(FRI)
元旦日，又係我扮偽大廚時間，因為約晒所有家庭成員返爸爸屋企食晚餐嚟個小慶祝。
今次應要求煮左一個充滿回憶嘅餸，幸不辱命...我都算成功煮左依個蠔油冬菇炆掌亦~

蘆根薏米雪梨水

31 DECEMBER 2015(THU)

上星期我煲烏卒卒嘅三棗茶(按此重溫)俾小小豬飲嘅時候，佢問我幾時有靚顏色嘅涼茶飲(哈哈哈...總之唔係黑色佢就話靚呀)。既然佢有要求，就等我煲過蘆根薏米雪梨水俾佢飲，滿足一下佢啦~

其實我最初都係只係打算煲用薏米嚟煲雪梨水，正當我去藥材買材料時，店員就叫我打埋蘆根、銀花同甘草一齊煲，有清熱袪濕同埋潤肺生津等功效，而且仲話對濕疹好好，可以清下啲內熱添。一聽到話對濕疹好，緊係即刻執返份材料返屋企煲啦！

材料就有雪梨四個，蘆根、薏米、銀花及甘草。基本上所有材料係藥材店都可以買到，只需要同店員講有幾多人飲，佢就會執所需份量，我三人份量都只係$15~

雪梨洗淨去核切塊~

所有材料要浸洗半小時~

將全部材料及1L水放入煲內~

待水滾後轉用慢火煲約1小時，咁就煲好啦~

待涼後入樽，就可以飲得啦~

蘆根我之前都煲過，所以都知道有少少庶味，今次加埋雪梨一齊煲，甜甜地又幾好飲，小小豬都飲得好樂意添~

店員仲教我依個涼茶可以清臟腑熱，如果準備接種預防疫苗嘅小朋友服用，咁就可以可減少打針後不適。不過.....藥材依方面都係好因應個人體質，所以記得煲之前了解下自己，或者問下相熟藥材店職員，依個藥方啱唔啱飲呀！

 

**我地嘅FACEBOOK FAGE，唔知大家LIKE左未呢？**
小小豬的成長日誌
大家一齊嚟交流下煮飯仔及去玩嘅親子樂啦！

 

試用：V10Plus 深層保濕凝膠

30 DECEMBER 2015(WED)

聖誕節嘅時候唔止小小豬有禮物收，就連我都有得收禮物呀！多謝Petit Bonheur為我送上V10Plus 深層保濕凝膠，等我又可以扮靚啦~

V10Plus個名我都聽過好多次，好多朋友都話佢嘅產品好用，尤其係佢啲保濕精華，聰到都好想試呀！

估唔到我一有機會就可以試用到佢最新推出嘅V10Plus 深層保濕凝膠，真係超興奮呀~

V10Plus產品係由日本製造，完全好放心使用啦~

今次依個V10Plus深層保濕凝膠可以話係保濕系列嘅加強版，水解藍色龍舌蘭莖提取物再配合蘆薈精華同埋香橙果提取物，可以達至高效保濕之餘，並有助於保留肌膚水分。

質地呈透明啫喱狀，感覺軟軟柔柔的，而且沒有任何味道，都幾舒服呀~

非常容易推開，皮膚都好快吸收，最好就係唔會覺得油油膩膩嘛~

基本上由我一收到支產品開始，我就好乖乖咁每日早晚使用，我都差唔見用晒啦~

本身我皮膚都好容易呈現缺水嘅狀態，用左依個之後，明顯甩皮情況係減少左，同埋乾紋都少左。最令我驚喜嘅係當我第二朝一起身，面都未洗都會覺得皮膚仲係KEEP到滑滑般，我估應該係保水鎖水起的作用吧！

 

More Information :

Petit Bonheur online store
Website：http://www.petitbonheur.com.hk/
Facebook：https://www.facebook.com/PetitBonheurOnlineStore

 

**我地嘅FACEBOOK FAGE，唔知大家LIKE左未呢？**
小小豬的成長日誌
大家一齊嚟交流下煮飯仔及去玩嘅親子樂啦！

 

 

超盡興的東華慈善嘉年華

30 DECEMBER 2015(WED)

繼上星期我地去左暢遊AIA 歐陸嘉年華之後(按此重溫)，今日我地再接再勵，相約仁叔叔同SY哥哥去東華慈善嘉年華大放電呀~

一入到場兩位小朋友就已經急不及待咁話要咩...傾下玩邊樣先，就咁睇地圖又真係幾多嘢玩，難怪佢地要傾咁耐~

不過....其實我地兩個大人一早已經決定左，第一時間就係去挑戰「超級紐約滑梯」呀！

之前睇宣傳介紹話要高過120CM先可以玩，所以我地仲傾好左分批玩，以便睇住兩個小朋友。點知原來係可以同小朋友坐埋一齊瀡，我當然係非常樂意依個安排啦~

其實整個滑梯都有差唔多六樓嘅高度，坐係上面等瀡嘅時候都有啲啲驚，不過玩落又真係唔驚，因為過左第一個波浪之後，過左嗰一個離心力之後就完全唔驚啦~

睇小小豬笑得咁開心就知有幾好玩啦~

依個唔識驚嘅小小豬仲話要陪仁叔叔玩多次，所以佢又可以連玩兩次，都真係興奮到頂點呀！

之後我地就轉戰大型彈彈，其實依個彈彈床同我地之前去Sanrio Family Sports Day玩嗰個應該係完全一樣，唯一唔同就係今次只可以小朋友入內玩。

有得自由地任跳入爬，兩位小朋友緊係勁開心啦~

仲要有「陀飛輪」做背景，係有氣勢啲呢...哈哈哈~

之後我地轉戰「纽约滑梯」~

依個可以話係小小豬期中一個期待遊戲，因為佢啲PEPPA PIG其中一個故事係有玩依個，所以佢要同PEPPA齊齊玩，依個又點會難到唔識驚嘅豬仔呀~

一連玩左幾個刺激遊戲，係時候文靜啲啲，坐下船仔啦~

再去玩幾個攤位遊戲，當然....我地又係失敗，嬴唔到獎品啦~

小小豬見到個轉轉鞦韆又話想玩~
不過我有理由相信佢係因為有隻BEAR BEAR陪玩先想玩，依個傻豬仔初時仲扶住BEAR BEAR一齊轉，最後負責姐姐開咪叫佢放開公仔先肯放手呀~

見到咖啡杯當然又想玩啦，今次仲係可以大人陪，我又借機玩下先。不過....原來同迪迪尼嗰個係唔同，只可以圍住轉，唔可以自轉，當場........有啲啲失望添~

場會中有一個哥爾夫球場，雖然兩位小朋友都唔識玩，不過我就建議入去玩轉，亂咁嚟試下等佢地接觸哥爾夫係乜東東都好呀~

小小嘅沙地，佈置成海賊模樣，依難度分大約十級有十個洞。一如我所料....小小豬都係亂咁嚟，最後仲索性用手入洞，真係俾佢激C。不過算啦，見兩個小朋友都玩得咁開心，小小豬跟住SY哥哥玩完一轉又一轉，所以放過佢啦~
最後我地就去小小豬嘈左好耐要去嘅「兒童創意動感區」，因為榻整個場地都係可以駕車，啱最車仔控嘅小小豬呀！

基本上之前玩嘅遊戲都唔係點要排隊，今日唯一大排長龍嘅就係依個小小賽車手，我地排左差唔多半個鐘有多先可以玩到呀~

渣住部電動車圍圈行大約六分鐘，唔知係唔係因為DADDY關係，小小豬特別鐘意渣車，佢仲渣得非常安全.......好慢呀......哈哈哈~

另一個小小豬樂而忘返嘅地方就係依個HotWheels鬥車場，只要俾$50入場就可以拎一部HotWheels車仔份入面任玩一個鐘~

場內最特別係有一個高天台，等小朋友將車仔衝落去，睇下邊部HotWheels最利害。小小豬來來回回都走左唔知幾多次，平日叫佢執嘢都冇咁快，一見部車仔衝左落地就極速咁落嚟執~

另外都有好多唔同大小嘅HotWheels小裝置，俾小朋友們鬥車一番呀~

場內都設有啲小凳俾小朋友企高玩，又幾貼心哦~

兩位小朋友唔覺唔覺係入面又玩左差唔多一個鐘，所以話...車仔對小朋友(尤其男仔)嘅影響力真係唔可以睇少呀！

又俾小小豬見到遠處有得玩渣車車遊戲，雖係只係較輕量級嘅豬仔車，不過小小豬都一樣玩得何其高興呀~

嘉年華又點少得充氣遊戲呢，小小豬又點可以唔入去玩番轉~

玩左成日刺激嘅遊戲，最後一樣玩靜靜地嘅「MegaZoo」啦~
入面有個大型嘅積木池俾小朋友任玩，佢地仲好細心設有兩個場地，咁就可以將大小朋友分開玩，安全啲嘛~
另一個大池就真係幾大，真係完全任玩。而且仲有哥哥姐姐陪你玩添~
今日場內哥哥仲教小朋友砌蝴蝶添~
其實係因為有一個砌積木比賽， 既然一場嚟到當然又玩下啦~

估唔到依個「兒童創意動感區」我地一玩就玩左差唔多三個鐘，真係由天光玩到天黑，小小豬話係入面玩得係最開心呀~

其實我地今日睇見東華慈善嘉年華都仲有好多遊戲係準備緊，好似小小豬想玩嘅過山車同埋碰碰車都未開，加上今日佢又係「兒童創意動感區」玩得咁盡興，所以應該會係三月尾嘉年華結束前，同小小豬再入嚟玩轉啦！

 

**我地嘅FACEBOOK FAGE，唔知大家LIKE左未呢？**
小小豬的成長日誌
大家一齊嚟交流下煮飯仔及去玩嘅親子樂啦！