靚靚雪糕玫瑰花

1 APRIL 2015(WED)

今日約左朋友係旺角拎啲小禮物，行過朗豪坊地庫見到有之前好多朋友仔都食過嘅雪糕玫瑰花，所以就同小小豬一人買一支嚟試下啦~

其實之前見好多朋友仔係FACEBOOK洗版式咁POST依個雪糕玫瑰花，我都已經勁想加入依個洗版行列。不過一直搵唔到機會出旺角，今日無意中路過，緊係要試下啦~

一嚟到雪糕店，就俾個玫瑰花櫃吸引住啦~

記得之前有朋友仔介紹過，雪糕玫瑰花有九款唔同味道。不過今日嚟到就只有藍莓、士多啤梨、綠茶、朱古力、牛奶~

小小豬話: 依啲係花花嚟哦...真係可以食~

最後經我一輪講解，小小豬終於知道係雪糕嚟，仲揀左佢愛嘅味道添~

小小豬嘅士多啤梨味，我試食左幾啖，士多啤梨味都幾重，而且帶有少少酸，味道唔錯~

我嘅綠茶味玫瑰花，其實我原本係打算試食朱古力味，點知小小豬極度建議我買綠色，佢話綠色係第二靚哦(當然佢係唔知依個味就係綠茶啦)！

見隻豬仔極度建議，就順下佢意思一次咁多。我一向唔太好綠茶，因為好怕嗰一種苦澀味。不過依款食落又唔會覺得有那一種苦澀，帶有一陣淡淡綠茶味啦！不過如果極度愛好綠茶者應該會覺得味唔夠濃呀~

小小豬正在滋味地辣手摧花中~

味道係可以接受，不過我覺得整個玫瑰花雪糕都係比較結實，同埋雪味重左少少(我地剛剛拎上手時仲見到啲小冰粒粒呀)，唔多唔少影響左個口感。

不過咁靚靚又特別嘅雪糕玫瑰花，平時都真係好少見，所以都可以試下，用嚟呃LIKE都唔錯呀....哈哈哈哈！