台式炒蜆

9 APRIL 2015(THU)

今日同小豬爸行過海鮮檔，突然想食炒蜆，所以我地就買嚟做今晚晚餐之一。我今次就用左一個新煮法嚟整，就係台式炒蜆啦~

其實我都未去過台灣，所以都真係唔知點係叫做台式炒。不過本烹飪書係咁標題，所以我又係咁講啦~

花甲先放入約鹽於水中浸約30分鐘，以便吐沙~

黃椒洗淨切件(唔一定用黃椒，用其他顏色椒都可以呀)~

將半個蒜頭剁成蒜蓉，半舊薑剁成薑蓉及2棵蔥切成小段~

先用油爆香啲黃椒備用~

用油爆香一湯匙蒜蓉豆鼓醬，然後加入蒜蓉，薑蓉及蔥段~

最後加入黃椒~

待爆香所有材料之後，下蜆快手兜勻~

加蓋中火煮約1分鐘~

然後加入少少蠔油及玫瑰露酒，再用大火炒至全部蜆殼打開，咁就食得啦~

哈哈哈...比起傳統嘅豉椒炒蜆，依款個味係濃啲同埋香口啲，可能加左蠔油關係啦！

又學識多一個新餸煮俾屋企人食，見大家都食得咁開心，真係超級有滿足感呀！