【治癒系雪糕】超靚棉花糖雪糕@L’attitude

3 FEBRUARY 2017(FRI)

話說有一日大仁問小小豬想唔想去食大熊貓雪糕，依個為食豬一聽到雪糕兩個字就已經雙眼發光，所以就齊齊嚟食超靚棉花糖雪糕啦~

 

其實上次我地行經尖沙咀都見到依間小店，嗰時都好想入去試，不過人太多加上一向唔多願意排隊嘅DADDY同行，所以就冇試到。

今次我地就相約店鋪一開就去，所以唔洗點排隊就可以食到啦~

 

小小豬滿心歡喜可以同佢最好嘅SY哥哥玩，點知SY唔舒服冇一齊嚟，初時佢都有丁點失望，點知一見到餐牌上嘅靚靚雪糕，佢就咩都唔記得，只係識諗食邊款雪糕好啦~

 

除左雪糕，都仲有意粉食添~

 

店內仲有一個大公仔同埋好多卡通牌仔可以大家拍照，實行未食就先興奮~

 

未食正餐又點可以食雪糕？所以我地就叫左兩碟意粉打打底先！

首先就嚟一個羽衣甘藍帶子扁意粉~

 

店員同我地介紹時話，佢地用嘅羽衣甘藍係每日新鮮送店，然係即榨汁而成，而且佢地唔落味精，所以食得健康。其實個味都OK，不過我個人就覺得比較乾身，不過那兩粒大大嘅北海道帶子就非常鮮甜呀！

夢幻溫泉卡邦尼扁意粉~

 

其實依個就係將冷榨而成嘅紅菜頭汁加入卡邦尼中，再配上一粒溫泉蛋。我個人覺得依個真係好好味，紅菜頭味道好甜，而且加入左溫泉蛋令到整個意粉帶點濕濕地，啱我口味呀。 

小小豬今日食得又快又乖，緊係啦....因為食完意粉就可以食雪糕啦~ 

 

先嚟晶晶嘅「粉紅蓬蓬裙」，因為夠晒靚用嚟襯托杯緣子呀~

 

用粉紅脹卜卜嘅棉花糖，再配合牛奶加朱古力扭紋雪糕，真係超靚呀。小小豬都忍唔住偷食姨姨嘅粉紅棉花糖呀~

 

之後就到店內皇牌「大熊貓棉花糖」，原本係大仁嘅雪糕，我都真係忍唔到唔借嚟影相呃LIKE呀~

 

荔枝味嘅棉花糖，再配合巴西70%AMMA嘅可可粉朱古力雪糕，濃郁得嚟又唔太甜，而且仲非常滑。店員仲故我地先撕少少棉花糖，然係點雪糕一樣食，當然我地都有跟依個方法，效果又真係唔錯呀！ 

終於等到小小豬嘅「烏雲軟雪糕」，我地仲睇住姐姐整添~

 

以墨魚汁做嘅棉花糖，再配以牛奶雪糕而成，而且中間仲會有少少爆炸糖，口感同味覺真係一絕呀~

 

睇小小豬依個為食樣，食到成口墨魚汁就知佢有幾鐘意，佢仲過分到一個人食晒大半杯，只係留左幾啖俾我咋........真過分呀~

 

其實又點止依幾樣食品，我對佢地杯特飲都好有興趣，原本打算留肚食雪糕先冇叫到，唔緊要啦....小小豬一返到屋企就不停同DADDY講個雪糕有幾好食，心軟DADDY又開始動搖，所以相信好快我地又會再嚟食過呀！

**我地的FACEBOOK PAGE，齊齊來交流親子。育兒。烹飪啦**