又嚟到每星期我寫得最順心又開心嘅文章，就係每周小小豬嘅愛心便當，唔覺唔覺就已經嚟到第六周啦~
上星期就因為自已唔舒服，所以冇乜整公仔便當俾小小豬，估唔到今個星期都係冇乜整，唔係因為我未病好，只係因為有個小朋友依排進餐時非常唔乖，極度不專心咁食，所以就激嬲媽咪，咁就冇公仔便當啦！
星期一就整左個南瓜肉餅飯，其實南瓜真係好有益，所以我都成日煮俾佢食呀~
星期二就係蕃茄抄雞蛋，睇見就好似好少餸，依度其實係有三隻雞蛋在內，因為兩隻雞蛋又真係幾難抄，所以煮多少少就好似方便左自己。唔知係咪蕃茄開胃，小小豬竟然全部同我清晒，仲大讚好食，有時對住依隻豬都唔知好嬲定好笑呀~
星期三就嚟小小豬至愛壽司餐，其實佢可以食嘅壽司都係得嗰幾款，所以食嚟食去到係依啲，不過小小豬一樣繼續食得津津有味(不過....我開始整到有點悶，係時候要考慮轉轉款了)
星期四小小豬話想食烏冬，所以就用左啲食材砌左個小朋友樣俾佢。相似度又真係麻麻，不過最重要係小小豬收貨，佢仲話我係砌左佢個樣，等佢自己食自己落肚哦~
星期五小小豬主動提意再食蕃茄，雖然前幾日都煮左，不過蕃茄都係好有益又開胃，所以今次就連同牛肉一齊煮俾佢，加多左一隻小鴨仔做裝飾，感覺又即可愛晒...哈哈哈~
成日覺得我煮嚟煮去都係嗰幾樣，雖然小小豬冇話悶，不過始終都想多元化啲，等豬仔可以食得更加開心，所以我要繼續努力，鑽研多啲有益又健康嘅愛心便當先得！
**我地的FACEBOOK PAGE，齊齊來交流親子。育兒。烹飪啦**
沒有留言:
發佈留言