【愛心午餐】小小豬的第四周愛心便當

10 FEBRUARY 2017(FRI)

經過一個新年假期，我嘅送飯工作又要再開始，睇下今星期小小豬食乜便當~

 

新一年第一個上學天，小小豬話佢好想食壽司，咁好啦....就整幾粒壽司俾佢，等佢開開心心又上學啦~
 
我終於買到腐皮，可以整腐皮壽司，原來腐皮壽司又真係幾易，我想整多幾次都得。不過原來粟米軍艋就冇想像中咁易，我包左三次先叫做成功呀！ 

星期二就整左蕃茄三文魚柳，依個餸小小豬一向都鐘意食，所以都問題不大。為避佢話冇公仔，所以我就用豬肉鬆整左個K字，成功過關...哈哈哈~

 

星期三就食烏冬~

 
我用左豬肉碎做頭髮，整左男仔圖案出嚟，小小豬一見到就話我砌左佢出嚟，要食自己落肚。看似冇乜餸，但其實烏冬下係有兩粒餃子同一啲瓜粒，所以係好豐富嘅一餐嚟呀！ 

星期四就攪攪新意思，整左個醫神便當(都幾似呀...呵呵呵)。餸就係蕃茄炒雞蛋，再加少少蟹柳，全部都係小小豬至愛，佢又點會唔同我快快手清晒呀~

 

星期五就整左個失敗便當，原本係燒汁雞扒加飛機飯團，點知一時錯手擺錯次序，就變成依個樣衰版~ 

 
唉.....我應該係將啲餸放底，然後飛機放上，咁就靚好多啦，真失敗！不過失敗乃成功之母，我有信心下次再整過就一定好好多！ 

我要繼續努力研究下有咩新餸菜係啱做便當，等小小豬日日都有靚靚愛心便當！

**我地的FACEBOOK PAGE，齊齊來交流親子。育兒。烹飪啦**