【清熱滋養】西洋菜響螺瘦肉湯

28 FEBRUARY 2017(TUE)

尋晚買左啲西洋菜打邊爐，不過因為買太多食唔晒，咁就緊係留嚟煲湯。見屋企又有幾隻急凍響螺，所以就只係買少少瘦肉，所以就嚟一個清熱滋養嘅西洋菜響螺瘦肉湯啦~

西洋菜湯就可以清熱潤肺，螺頭就係滋陰，加埋一齊煲湯就可以帶出鮮甜呀！

西洋菜一斤、急凍響螺三個、陳皮一少片、南北杏一水竹湯匙及瘦肉約$30~

 

急凍響螺頭先洗淨，然後用刀輕輕挑開腸附近嘅皮，將入面嘅污物連腸掉下，然後汆水；瘦肉同樣洗淨後汆水~ 

 

西洋菜先用鹽水浸佢一小時，中途最好換兩次水，因為西洋菜係水種植物，一定要洗乾淨啲呀；南北杏及蜜棗洗淨；陳皮浸軟刮去皮瓤~ 

 

煲內放約3L水，然後隨水加入陳皮~ 

 

待水滾後加入所有材料，一定要大滾先好加人西洋菜，如果唔係煲出嚟嘅湯就帶點甘苦味呀~ 

 

繼續用大火加蓋煲約30分鐘~

 

之後轉慢火加蓋煲多1.5小時~ 

 

最後加鹽調味，就可以飲得~

 
第一次用螺頭嚟配西洋菜，其實我都有丁點擔心唔知係咩味。不過估唔到啖湯又真係清清甜甜，啱晒老公口味，佢仲叫我下次唔好用羅漢果嚟煲，話依個仲好味哦！

哈哈哈...我意見係會接受，但態度係會照舊。唔係話今次煲唔好飲，只係西洋菜加羅漢果可以話係我少少嘅童年回憶，所以就.........由我啦！


溫馨提示：由於個別人仕體質不同，所以大家記得煲之前了解下自己，如有疑問，請先向註冊中醫查詢！ 

**我地的FACEBOOK PAGE，齊齊來交流親子。育兒。烹飪啦**