【靚靚CUPCAKE親手整】親子快樂復活節DIY

26 MARCH 2017(SUN)

其實我都真係幾鐘意整蛋糕，不過無奈我家老細平日唔好蛋糕，整左出嚟冇人食又真係幾冇引，所以最好就係外出整。一嚟有導師帶住一定會成功，二嚟又可以唔洗做一輪煩忙嘅善後工作，真係整都整得輕鬆啲。

感謝BK MILK安排，今日可以嚟跟Twinkie導師學整翻糖Cupcake迎接復活節~

其實早係小小豬四歲多時，我都同佢去過Twinkie整Cupcake，不過因為當時小小豬都仲係細，參與度唔算大，所以基本上全部都係我整。不過佢依家六歲了，大個仔就可以自己整啦！

導師一早為每位小朋友準備好晒整翻糖Cupcake嘅材料啦~

 

翻糖Cupcake對我地嚟講又真係唔容易(因為我真係零藝術天份)，當然要留心聽導師講課先啦~ 

 

由於迎接復活節，我地嘅Cupcake就當然係整兔仔同雞仔，導師仲好有耐性地為各小朋友示範，不過由於場地都有好多小朋友，所以我都不便影太多相影響佢地學習，所以都只可以靠小小豬自己去睇會，到最後我先去睇導師個完成品啦~ 

 

首先我地就整兔仔，搓個糖皮、蓋個印仔、幾個步驟就整左兔仔個PAT PAT啦~ 

 

之後就睇導師示範整雞仔~ 

 

睇完就到小小豬整啦，估唔到小小豬又跟得幾足，都整得幾似呀~ 

 

整好左復活節主角，就到整下啲佈置花花，其實依個功驟可以話係最用力嘅一環，因為係需要將細細粒嘅粒粒貼於小花上面，都真係幾考手定力。都算小小豬做得唔錯，好專心咁完成大部分嘅小花呀~

 

終於嚟到最後一環，就係吱CREAM之後將所有材料佈置係Cupcake上~

 

登...登....登....登....小小豬嘅復活節Cupcake完成，其實都整得唔錯呀~ 

 

依隻豬仔仲對佢嘅手作仔好滿足，不停讚靚呀~

 

到最後小小豬仲帶埋啲靚靚Cupcake返屋企，話要同DADDY分享呀~ 

 

整左個靚靚Cupcake都真係幾有滿足感，而且小小豬仲有點意猶未盡，仲叫我去買材料俾佢返屋企再整過，要教DADDY整哦！

 

**我地的FACEBOOK PAGE，齊齊來交流親子。育兒。烹飪啦**