【懷舊一番】得寶牛下新城

27 MAY 2016(FRI)

得寶商場曾幾何時我都日日去，因為我係嗰頭返工(不過都係好耐之前嘅事啦)，最近見佢地嚟個大改動，打扮得好懷舊，所以就帶小小豬嚟行一轉，睇下有懷舊啦~

其實未嚟之前都睇左好多平台介紹過，見都好似幾吸引，尤其係嗰個懷舊嘅磅同埋嗰一個涼茶鋪位，真係令我好有深印象，所以都帶點期待去睇下重新裝修嘅牛下新城有幾特別。 

原來整個得寶商場就只有地庫那一層以懷舊佈置，雖然感覺上又好似少左啲啲，不過望入去又真係幾落本佈置哦。 

依家真係好少見咁懷舊嘅磅，我記得細細個去跟家人去睇戲都一定要企上去磅一次先入場睇戲(大件事....爆左自己係咩年代添)，估唔到依家到小小豬可以企上去磅一下~

 

個磅係可以用到，只要入$2就可以，都幾抵玩呀~ 

 

見到有跳飛機，小小豬又玩左一陣先肯走~ 

 

四周都有好多懷舊佈置，一啲特別嘅招牌又真係懷舊得嚟又幾攪笑~ 

 

對住啲算盤，小小豬就好似新奇咁，因為佢之前未見過，我又同佢慢慢講呀~ 

 

巴士站當然係小小豬至鐘意嘅場景之一，係度扮等車都可以玩一餐，小朋友嘅天空就係咁簡單，只要佢鐘意，就一定搵到佢玩嘅方法~ 

 

終於嚟到我最期待嘅涼茶鋪，佢又真係佈置得唔錯，坐定定係度飲涼茶，又真係幾啱感覺呀~ 

 

仲有兩個仿戲院嘅位俾人影相~ 

 

另外有一個懷舊屋佈置，小小豬細細粒影出嚟冇乜感覺，我諗成年人嚟影一定好玩啲~ 

 

飛機欖呀，就連我都未食過，不過小小豬話黑卒卒唔想食，所以就連我都唔俾買，唯有就係影左當食左啦....哈哈哈~ 

 

場內仲有一個美食廣場，大部分都係以前牛頭角下村食店嚟食度開店，原本都想試下好出名嘅漢寶包，但我地晏左，已經賣晒啦，唯有等下次先嚟啦~ 

 

係牛下新城入面都有一間PLPAYHOUSE，原本都想俾小小豬入去玩一轉，不過由我係外面望入去，地方又好似太細了，大人同小朋友已經好似迫爆左間店咁，所以都係唔入去玩~ 

 
牛下新城係有佢特別嘅地方，佢嘅懷舊佈置出大型店場比，又真係有啲特色。不過因為大部分嘅店鋪都好似未租出，所以行街地方又真係少左啲，如果可以開多啲店鋪，再加埋懷舊佈置，應該會更加吸引呀！

**我地的FACEBOOK PAGE，齊齊來交流親子。育兒。烹飪啦**