蕃茄豆腐魚湯

1 MARCH 2016(TUE)

其實我都真係幾鐘意煲湯，除左飲多啲湯水人都健康啲之外，當然亦都係因為小小豬啦，佢真係我嘅頭號粉絲，每次見佢大碗大碗咁飲，之後又讚啲湯好飲時，又真係勁有滿足感之餘，亦都係我繼續俾心機煲湯嘅動力。 所以除左煲啲老火湯之外，平日我都會滾魚湯嚟飲。

千其唔好睇少一個簡單嘅魚湯，雖然看似簡單，但其實功夫係比老火湯還要多。或者係有其他簡易嘅煮法，不過我多少少功夫就可以減少魚骨卡喉嚨嘅風險，可以令小小豬飲得安全，我完全唔介意呀~

魚兩條、瘦肉約$20、蕃茄三至四個、豆腐一小盒、薑幾片~

 

魚其實都冇特定用邊款較好，一般我都係用紅衫魚、大眼雞或者梭羅魚，視乎買嗰日魚檔邊啲魚靚啦，我今次就用左青根魚嚟煎湯。 薑去皮切片，由於小小豬唔鐘意嗰一陣薑味，所以我都只係落三片左右，如果受得薑味的話，落多幾片個味仲好呀(當然只限我地成年人飲啦)。

蕃茄切塊及瘦肉切件汆水備用~

 

青根魚洗乾淨之後，一定要印乾所有水份，如果唔係一陣煎魚時就勁彈油啦(我都中過無數次招，所以一定要小心呀)~

 

先燒熱鑊加小量油，將魚煎香，煎耐一點啲魚味就會出啲呀~

 

兩邊都煎香之後，就加以加約1.5L水~

 

然後蓋上蓋開猛火滾起碼10分鐘大火煮到至湯為奶白色~ 

 

之後隔開魚肉魚骨，湯就倒入煲內~

 

繼續重覆步驟一次，再將1.5L水倒入煎魚鑊內，直至湯為奶白色再隔開魚肉，湯就倒入煲內，咁就可以多啲湯飲啦。係依次滾湯嘅途中可以壓下啲魚骨，咁就可以等啲魚出味啲呀~

 

將薑片同瘦肉放入純魚湯中，以中火煲約三十分鐘~

 

之後加入蕃茄煲約二十分鐘~

 

最後加入豆腐煲約十五分鐘，建議豆腐唔好切得太細件，如果唔係好易會散晒，咁就食唔到啦~

 

最後加少少鹽調味，一碗好味嘅蕃茄豆腐魚湯就完成啦~

除左可以加蕃茄同豆腐之外(不過我個人覺得蕃茄同豆腐營養多啲，所以我多數用依兩款一齊煲)，仲可以改用木瓜、節瓜或者冬瓜等蔬果，都一樣係有益同好飲。魚湯變化都好多咁，都唔洗怕小朋友飲到悶啦！

**我地嘅FACEBOOK FAGE，唔知大家LIKE左未呢？** 

小小豬的成長日誌
大家一齊嚟交流下煮飯仔及去玩嘅親子樂啦！