輕鬆玩樂三家村

29 MARCH 2016(TUE)

係四日復活節紅日假期中老公都有事要忙，所以都冇乜時間陪佢個乖仔周圍去玩。原本今日佢就請左假打算入HELLO KITTY農莊玩，點知地睇佢地網頁時，發現佢地係星期二休息，所以就要改節目，近近地去三家村石灘輕輕鬆鬆咁悠閒一番啦~

三家村我地都間唔中都嚟，因為近我地嘛，由屋企搭小巴去都唔洗十五分鐘，緊係多啲嚟都唔怕啦！
 
其實鯉魚門三家村都有好多唔同嘅地方，沿住入口行一陣就已經有一個玩樂點，三款唔同嘅跳飛機等緊小小豬呀~

 

依家真係好少地方見到有跳飛機了，所以就等小小豬一陣，同時又俾啲時間我嚟個童年回憶啦~

 

沿路一直行就到我地今日主要嘅目的地，就係依個對住個海嘅靚VIEW石灘啦~

 

望到個燈塔，小小豬就已經話要走上去睇風景啦~

 

有愛豬號DADDY係度，完全唔洗驚有危險啦~

 

話咁快兩父子就上左燈塔吹吹風啦~

 

佢地兩父子洗唔洗咁CHOK呀~

 

今日小小豬狀態極好，當佢坐係啲大石上睇風景時，叫佢影幾張相都好合作，仲影得幾靚仔，真係人靚景正呀~

 
睇完風景，小小豬就開始玩佢最鐘意嘅活動，就係拋石仔，首先就係要搵石仔先。

依個石灘風景係好正，不過亦都有一個缺點，就係都有好多大大少少嘅玻璃碎，所以搵石仔時一定要非常小心呀~

 

搵到啲石仔就可以開始啦~

 

小小豬都好盡力咁拋呀~

 

見到自己粒石仔拋得遠時，開心得佢呀....小朋友就係咁簡單，少少一件事都可以好興奮啦~

 

見今日小小豬咁好狀態，當然又要捉佢扮B模，估唔到又幾有FEEL哦~

 
其實三家村又唔止得依個石灘，行入啲就仲有天后廟、唔同大少嘅石灘，仲有一個小山嶺。不過我地就鐘意係依個近近地嘅大石灘玩，舒舒服服咁坐係度吹吹海風..望望船..睇下風景，仲可以玩下拋石仔，已經係一個好好嘅親子活動。

有時又真係唔洗咁辛苦左諗右諗去邊啲特別嘅地方玩(為左啲咩呢？)，只要有父母用真心陪伴，就算輕輕鬆鬆咁坐係度睇風景，小朋友都一樣會感受到嗰一份喜悅，一樣會玩得開心！

**我地嘅FACEBOOK FAGE，唔知大家LIKE左未呢？** 

小小豬的成長日誌
大家一齊嚟交流下煮飯仔及去玩嘅親子樂啦！