桃膠黃耳燉豬展

18 MARCH 2016(FRI)

今晚又嚟錫下自己，整左個桃膠黃耳燉豬展，等我自己滋潤下先得~

其實之前都整左兩個桃膠嘅甜點，不過因為老公唔太"好"依啲甜點，所以上兩次都係我一個人食晒兩大碗。

雖然係好食，但食得多都真係唔好話唔怕又肥多好幾磅，所以都真係唔敢再整！

前日見有朋友係分享左用桃膠加上黃耳嚟燉湯，咸點老公就會陪我食啦，所以就買齊材料又試下用燉湯方式嚟煮桃膠，唔知味道又點呢。

桃膠同黃耳都係植物界膠原蛋白之王，可以增加皮膚彈性。紅棗除左補血同埋提升香濃甜味外，佢嘅維他命C更加可以增加膠原蛋白吸收，加埋一齊就對養顏健脾，滋陰潤肺都好好，所以依個燉湯真係好啱女性飲呀！

材料有桃膠1湯匙、黃耳1朵、桂圓5粒、紅棗8粒、豬展約$30、熱水2碗~

 

將桃膠及黃耳浸發一晚至變軟脹大，然後桃膠就要洗淨後把黑色部分剪走。黃耳就去蒂切細細舊~

 

紅棗去核，桂圓洗淨，豬展汆水備用~

 

將所有材料全部放入燉盅~

 

然後加入兩碗大滾水~

 

放入電子燉盅再燉2小時~

 

夠鐘之後就加少少鹽，就可以飲得啦~

 

除左啖湯之外，基本上所有材料都可以食得，依個夜宵真係勁豐富啦~

 
唔知係唔係隻豬展仔比較肥，所以啖湯就比較油左少少，我想如果改用豬肉眼依啲冇咁肥嘅肉，應該會好好多呀！

除左啖湯帶有一點油之外，其實味道都唔錯，我個人都覺得用咸點方式煮桃膠，好似啱我口味多啲哦！(起碼有老公陪我飲，我又可以潤一潤之餘，又唔怕肥多幾磅嘛)

**我地嘅FACEBOOK FAGE，唔知大家LIKE左未呢？** 

小小豬的成長日誌
大家一齊嚟交流下煮飯仔及去玩嘅親子樂啦！