超興奮萌遊昂坪360

28 FEBRUARY 2016(SUN)

今日小小豬終於如願以償，因為佢恨左好耐嘅360之旅終於成行，可以去搭HELLO KITTY水晶纜車啦~


整件事要由十二月初開始，小小豬每日放學係地鐵站見到昂坪360個HELLO KITTY水晶車廣告時，佢地會問我幾時去搭，佢仲攪笑到同我講HELLO KITTY係山上面等緊佢，真係俾佢啲藉口笑C！

其實....見小小豬咁恨(佢真係每日放學一見海報都提幾次呀)，我睇見都有點心軟，所以都有計劃同佢搭一次，等佢知道我地都會尊重佢嘅意見。

前排又凍又落雨緊係唔好攪我啦(我係十級怕凍的人)，終於等到天朗氣清，我地可以去萌遊昂坪360啦！

唔知係咪天氣實在太好，所以搭纜車嘅人都比較多，所以都要排一陣隊先買到飛。我就係度排隊，小小豬就話要睇下個地圖，計劃下帶我去邊度玩哦~

因為時間有限，環島遊今日就唔多啱，我地都係留係昂坪市集玩下啦！

小小豬好留心聽緊售票姐姐嘅細心講解呀~

 

真係連啲門票都萌啲呀~

 

由於唔係每一部水晶纜車都以HELLO KITTY佈置，所以都要等一陣先可以上到HELLO KITTY車。公仔控的我單睇外表都已經好吸引，所以我當然願意同小小豬一齊等HELLO KITTY車啦~

 

YEAH....我地上到水晶車啦~

 

哈哈哈...點解小小豬目無表情？咪就係因為第一次搭，再加上見到個玻璃底有少少緊張啦~

 

不過好快佢就由緊張變為興奮，全程好興奮咁周圍望，佢話要欣賞美麗嘅風景哦，真係俾佢笑C呀~

 

不過周圍嘅風景又真係幾靚，都唔怪得小小豬睇到咁入神~

 

哈哈哈...坐水晶車嘅指定動作~

 

大約半小時嘅水晶纜車之旅話咁快就完，小小豬非常唔捨得離開HELLO KITTY纜車呀~

 

不過一見到依個KITTY公仔佢就即刻開心晒，仲話KITTY嚟陪佢搭纜車呀~

 

全次昂坪市集以HELLO KITTY為主題，當然唔止一個KITTY影點，整個KITTY FAMILY化身成為唔同角式，陪大家影相呀~

小小豬不知幾鐘意依個豆腐花佈置，仲係度扮賣豆腐花店員添~

另一個小小豬至愛就係雞蛋仔店，一見到個雞蛋仔器佢又發傻地係度玩啦~

 

同KITTY影完相之後，我地就係昂坪市集周圍行下啦~

之後就去睇360動感影院~

 

影院其實係有兩套電影選擇，最後小小豬就揀左睇有關大嶼山嘅影片。帶上3D眼帶再配合會郁嘅坐位，間中又會噴水出嚟，都幾得意呀~

 

繼續我地就去睇360舞台~

由於場內係禁止影相及拍照，所以我地就乖乖欣賞節目啦。舞台其實就係表演一啲武打場面，雖然佢地都係扮打交，不過表演者都好落力呀！

原來係市集內有一個自然教育中心，入面主要介紹大嶼山嘅歷史同係島上嘅行山徑。原來香港都有好多行山地方，係咪要的起心肝搵機會去行下呢~

 

行完昂坪市集我地就轉向寶蓮寺進發~

 

係依個時候我地就見到好多牛牛，仲要係完全唔驚人添。真係我地驚時佢就慢慢行，勁攪笑呀~

 

一見到長長嘅樓梯，原本都只係打算坐係依個廣場，面向大佛感受下(老公話叫小小豬吸引靈氣，等佢乖啲哦)~

 

不過，小小豬好堅持話要行上去，所以就.....捨命陪仔啦~

 

幾經辛苦(我指我，佢地兩父子不知行得幾悠閒)，終於行到上去啦~

 

吹住小小涼風，望住遠遠嘅靚風景，又真係幾舒服，小小豬影相都CHOK啲呀...哈哈哈~

 

行都攰真係要抖下，嚟到緊係要去食碗出名嘅豆腐花啦~

 
雖然我地都只係昂坪市集一帶玩，不過真係唔講得笑，我地玩到差唔多六點幾先走。好在我地之前係買來回水晶車廂+活動門票嘅套票，所以就可以預早係去客戶服務中心登記回程快証，咁就可以慳左好多排隊時間啦！(我地走時見到普通車廂排隊要等一個鐘呀)

回程小小豬都玩到攰，再加上其他乘客都好斯文，所以我地都靜靜地欣賞日落嘅風景啦~

 
小小豬玩得有幾盡興？佢係回家途中已經計劃下星期要再嚟搭纜車，又話幾時去大澳玩，滔滔不絕講佢計劃嘅行程。

昂坪360開左咁耐今次我先係第二次搭，所以.......小小豬都應該要等下先啦。不過有愛豬號DADDY係度，應該都唔洗等得太耐.....哈哈哈！

**我地嘅FACEBOOK FAGE，唔知大家LIKE左未呢？**
 小小豬的成長日誌
大家一齊嚟交流下煮飯仔及去玩嘅親子樂啦！