太子蔘海底椰紅蘿蔔瘦肉湯

14 MARCH 2016(MON)

之前買左啲太子蔘用嚟加焗茶飲，見屋企仲有好啲存貨，所以就用埋嚟煲太子蔘海底椰紅蘿蔔瘦肉湯，等三口子齊齊滋潤一下啦~

太子蔘不寒不燥，有補益心氣作用。海底椰就有效清熱潤肺，止咳同埋滋陰潤燥。所以兩者加埋一齊煲仲唔係清熱潤喉又健肺補氣！ 

材料就有：太子蔘一兩(由於太子蔘都有帶一點甘味，怕小小豬唔肯飲，所以我落都只係落左一兩中嘅三分二)、海底椰一兩、紅蘿蔔一個、豬肉眼$40、蜜棗三個~

 

瘦肉洗淨汆水備用，紅蘿蔔去皮切塊，其餘嘅藥材就浸洗一陣~ 

 

將3L清水燒熱，然後放入所有材料~

 

待水再滾後轉慢火煲一個半小時~

 

最後加少少鹽就可以飲得啦~ 

 
可能加左個紅蘿蔔一齊煲，所以嗰一種蔘味都唔算太濃反而變成左一陣甘甘甜甜，我自己就覺得唔錯，都幾好飲哦！

不過睇小小豬都唔抗拒，仲乖乖咁飲左一大碗，我估都應該唔太錯呀....哈哈哈！

**我地嘅FACEBOOK FAGE，唔知大家LIKE左未呢？** 

小小豬的成長日誌
大家一齊嚟交流下煮飯仔及去玩嘅親子樂啦！