沒有最好、只有最合適

10 MARCH 2016(THU)

依幾日睇到不幸嘅事一件接一件，都真係有好大嘅感觸，不過亦都因為咁，令我回想起我兒時嘅一件往事，好想藉此同大家分享呀~

回想起我小一嘅時候，媽咪對我都好有期望，所以為我安排我入讀一所出名私小，我好記得除左中文課之外，所有課程都係以英文上堂，就連係小息時同老師傾計，都係要以英文交談。

資質平庸嘅我當然係讀都CC下，好多時放學做功課之後再溫書，都真係喊晒口。測驗考試更加唔在講，好多時我考試期間都會大病，有幾次仲入埋醫院吊鹽水添。
醫生話我係因為壓力所致，所以一到考試就會緊要有壓力，所以啲大病就會出晒嚟。 

最後媽咪知道事態嚴重，所以係我小二時就同我轉左一間中等程度嘅學校，之後我就輕輕鬆鬆咁係學校學習，係開心嘅環境下，緊係學得更加好，我好記得有一年仲考全級十名內添(我到依家都好自豪曾經咁叻呀)~  
其實我都好感激媽咪為我做左依個重大決定，如果佢一直堅持望女成龍心態，要我係嗰間名私小讀，真係唔敢想像我會變成點。

可能亦都因為我身同感受，加上媽咪嘅英明決定，所以我係教小小豬都有啲秉承媽咪嘅做法，唔洗佢嬴在起跑線，亦唔會將小小豬同其他小朋友比，因為每一個小朋友都係獨一無二，有唔同嘅發展進程嘛~
 
雖然係殘酷嘅大世界環境下，我地真係唔知可以做到啲咩嚟作出改變，只望依個大世界可以觀察多啲依家小朋友為讀書面對嘅辛苦，為佢地作出改善。不過作為家長嘅我地都可以了解一下自己小朋友嘅特質，多啲鼓勵說話，支持他們勇敢面對挑戰。 

有一老好老土但又係啱嘅說話，『沒有最好、只有最合適』，大家齊齊為小朋友嘅將來努力啦！

**我地嘅FACEBOOK FAGE，唔知大家LIKE左未呢？** 

小小豬的成長日誌
大家一齊嚟交流下煮飯仔及去玩嘅親子樂啦！