獅子會自然教育中心

3 MAY 2015(SUN)

大肥豬話見小小豬上次去有機農莊玩得咁開心，對農作物又好有興趣，所以今日又帶左我地去一個新地方，等我地感受大自然呀~

其實好耐之前我都嚟過西貢獅子會自然教育中心一次，不過小小豬就係第一次嚟，所以好多地方佢地好新奇呀！

獅子會自然教育中心都真係幾大，而且都有好多唔同戶外室內嘅地方，我地第一站就係先去睇下啲農作物先。

有左上一次係有機農莊體驗，小小豬明顯對啲農作物好有興趣，每經過一農地，佢地有留心睇下係種左啲乜呀~

不過，我個人就最鐘意依兩個天使與魔鬼的稻草人~

小小豬話佢又要扮農夫~

係自然中心入面都有個售買有機蔬菜地方，我地當然又入去八卦一下啦！不過我覺得啲菜唔算太靚，加上又比一般有機菜為貴，所以冇入手呀~

行過旁邊有間小食店，依個為食豬見到個雪櫃不知幾開心~

哈哈哈...佢用盡甜言蜜語，終於大肥豬批準佢買雪條食，所以我地去草地搵個位置嚟個小野餐，坐底慢慢食啦~

其實依度個環境又真係唔錯，地方靚之餘仲覺得好舒服，所以我又捉小小豬同我影下相啦~

有個傻爸爸係度扮勁呀...哈哈哈~

唉...真係俾依隻衰豬激C，同我影張張相都係唔笑，仲要苦情樣。緊係啦...因為佢又掛住玩嘛，佢係草地上跑跑走走，都不知幾享受，又點肯同我影相呀~

係戶外玩左一陣，我地就轉移地方，向室內各活動室進發。其實係因為玩到太熱，要入去過下冷河呀！

首先去參觀岩石室，了解下香港嘅各海岸公園及一啲化石~

之後就去參觀介紹現今農作物~

繼續就去參觀介紹漁業，小小豬最鐘意依度，因為有好多唔同種類嘅遊戲玩呀~

最後就去睇埋啲貝殼~

路經有個以環保及行山為主題嘅小攤位，有得玩小小豬當然唔放過啦~

好在平日訓練有素，再加上職員姐姐嘅小提示，小小豬好快就完仍任務，仲得到兩張獎勵小貼紙添~

其實我地仲有好幾個展區未行，原來各展區係開放至四點，所以唔夠時間行晒呀。

不過唔緊要，依家知道個度咁好玩，又可以郊遊又有得學習，所以等我地搵日早啲入嚟再玩過啦！