幼兒體操匯演

23 APRIL 2015(THU)

小小豬學校一年一度嘅幼兒體操匯演，依個咁重要嘅時刻當然要帶齊人馬(即我、大肥豬同LULU妹)一齊去支持佢啦~

早係老師開始教依套體操舞之後，小小豬每一日返到屋企都會不停係度跳，又會拉埋佢啲公仔朋友一齊跳。見佢依個咁認真同上心嘅表現，所以唔多唔少都對今年嘅表演有少少期待~

根據上年經驗，要早啲嚟排隊先有個靚位，就係咁我地情商左LULU妹早啲嚟搵個好位。LULU妹已經比開始表演時間早左半個鐘嚟到排隊，不過都要排成二十幾。

雖然都總算係搵到第一行位置，不過我地個位都比較後，再加上細細粒的小小豬又安排企中間排，所以完全俾淹沒在人海中呀~

唉...基本上絕大部分時間我地都係睇背面，所以都唔係點可以拍到DV，真係有少少失望添！

唯一慶幸就係大肥豬帶左支長鏡頭，咁都叫做為小小豬影到少少相作一個留念~

哈哈哈...有個傻爸爸見到依兩張相不停咁讚自已個仔靚仔，戀仔狂程度真係無人能及呀~

整體上小小豬都算跟到，同其他小朋友都好配合，只係間中有啲啲發夢，不過豬仔都叫做跳晒整隻舞，所以我都有俾個叻叻佢，小朋友要多鼓勵呀！

有左今次經驗，我地出年一定要再早啲嚟排隊，要搵個靚位先得。話晒出年都係K3，最後一年參加依個活動嘛！