西貢行行又食食

3 MAY 2015(SUN)

離開左獅子會自然教育中心之後，我地就向繼續入西貢，打算周圍行下，順便食埋晚餐啦~

其實我地入嚟都係冇乜特別，都係打算周圍行下咁，不過當我地行過小公園，依個貪玩豬又話想玩一陣，見有平日好少玩嘅韆鞦，就俾佢玩一轉啦！

貪玩豬玩得不知幾好開心，仲不停要推高啲...推高啲，睇到我都有少少驚呀~

玩完公園仔，我地就去海邊行下，其實係我想去睇下啲平海鮮。不過，我都唔夠小小豬嚟，佢望親啲小船上嘅海鮮，都會好大聲咁話...嘩..好大條魚！好多蝦呀！船主成日都以為佢係想買，真係俾佢笑C呀~

但其實我都真係好想買，啲海鮮真係勁抵，五隻大龍蝦都係$100，仲要隻隻都郁呀。不過最後都因為之後幾日都有節目，唔係屋企煮飯，所以唔買啦！

行完街街我地就去醫肚，行過一間泰式店鋪見好多人幫襯，啲餸嘅賣相又好似幾吸引，所以就揀左佢嚟食晚餐啦~

為左唔想等太耐位，所以我地就去左冇冷氣嘅走廊坐啦~

小小豬話要自己揀食乜呀~

由於我都唔算太餓，所以都係簡單叫左兩個飯，一個小食同兩杯飲品啦！

泰式海南雞飯，賣相都唔錯，啲雞肉都幾嫩滑。油飯都頗出色，雖然顏色唔係太黃，但飯都有好香嘅雞味~

隨海南雞飯附送嘅湯，雖然唔知個主要材料係乜，不過入口都可以，飲落都唔覺有味精~

菠蘿炒飯，煮得夠乾身而且又唔油膩，入口都好香，只係如果可以多少少菠蘿就會更加好啦~

豬頸肉串燒，可能由於送到嚟都已經唔熱，所以感覺上都係麻麻地，唔吸引呀~

芒果沙冰，味道都OK，有好香濃嘅芒果而且又唔會覺得甜~

珍多冰，都有好香嘅椰汁，不過嗰啲綠色果肉唔夠爽口，所以飲落就好似欠缺少少咁啦~

整體上今日依個晚餐都係OK，只係因為我地坐係冇冷氣位置，所以食到熱熱咁，唔多唔少都有影響到進食嘅情緒(尤其係怕熱嘅小小豬)。

我見旁邊幾枱嘅食物都好吸引，所以我地都應該會再嚟試埋其他嘢食，不過到時一定要去冷氣房座呀。