2014年11月8日星期六

偷半點悠閒McCafé

7 NOVEMBER 2014(FRI)

依排真係十分忙碌,就連靜靜地食個午餐時間都冇,不過今日就偷半點悠閒,去McCafé嘆左一個SET,為自己打打氣~
Picture

今日送左小小豬返學之後,原本係打算去麥當當食個快餐,之後又趕去我要到嘅目的地。點知當我入到麥當當就俾依個廣告吸引左,就係咁....我就由食快餐改為嘆蛋糕,即刻高貴左好多呀...哈哈哈~
Picture

今次都係我第一次光顧McCafé,因為一向我都唔飲咖啡,咁又點啱去幫襯呢?成日都見啲拉花咖啡都覺得好靚,今次我終於都可以一試,因為McCafé新出左一杯小鹿布朗尼熱朱古力,真係啱晒我呀~
Picture

成日都驚依啲拉花飲品個製成品同個廣告會好大出入,不過今次又真係唔多走樣,隻小鹿又幾可愛。依一刻都真係唔知點入口好,因為好唔想令到依隻可愛小鹿走晒樣嘛!

雖然係好唔捨得,不過都總係要飲落口,依杯朱古力味道又真係唔錯,比平日飲開嗰啲香濃同幼滑啲,或者係加左布朗尼糖漿嘅關係啦!

另外,我仲加左$16叫左一份新出嘅綠茶紅豆心太軟~
PicturePicture

老實講,依個心太軟就真係有點失色,入面個啲流心紅豆漿係唔錯,有好香嘅紅豆味而且又唔甜,不過實在太少分量,食幾啖就已經冇晒。另外個綠茶蛋糕比起坊間嗰啲就堅左啲,如果可以軟身少少,咁就應該會好味啲。

雖然個蛋糕味道就欠左啲啲,不過輕輕鬆咁食左一個SET,我就充充電,可以繼續有力量去迎接之後嘅忙碌啦!

沒有留言:

發佈留言