香蕉乳酪棒@51個月大

10 NOVEMBER 2014(MON)

唔經唔覺依隻傻豬仔都已經51個月大，就趁佢今日又大一個月，俾佢做啲特別事，就係一手一腳仲要唔洗我提點，整左香蕉乳酪棒棒食啦~

點解會整依個甜品？其實事緣就由講故事開始，早幾日大肥豬係圖書館借左依一本英文圖書~

係圖書入面就教小朋友整左三個小食，其中一個就係依個甜品~

正當佢地兩父子講到興高采烈時，就提意過不如我地又試吓整依個香蕉乳酪棒。就係咁我今日放學就同小小豬去行超市買齊材料，齊齊開工啦~

首先將香蕉剝皮先~

將香蕉切開一半~

然後將啲雪條棒插上香蕉~

原本圖書就話係準備啲曲奇碎，不過為左令個棒棒靚啲，所以我就改用左啲彩色嘅朱古力碎碎啦~

將啲香蕉插入乳酪杯內，等啲香蕉充滿乳酪之後，就可以放落碟朱古力碎碎度碌...碌...碌啦~

碌碌完嘅香蕉棒棒係唔係好靚呢~

最後放入雪櫃上格雪大約一小時~

大功告成，可以食啦~

睇吓小小豬食得幾滋味，可能由始至終都係佢自己一手一腳整，所以小小豬食得特別開心，仲充滿左自信心添呀~

平時同小小豬做親子廚房，都係我負責講個步驟，然後小小豬跟住去做。不過今日就有啲唔同，因為全程小小豬都係自己做，我唔洗幫手。小小豬一邊做就一邊講返個故事出嚟，又真好係幾叻仔哦！

不過今日除左俾個叻小小豬之外，亦都要俾個"LIKE"大肥豬，因為佢諗到借依本圖書，等小小豬可以聽故事學英文之餘，仲可以透過整依個小食加深小小豬對故事嘅了解。

雖然平日小小豬都已經好鐘意聽故事，今次可以藉故事嚟整嘢食，等小小豬接觸多啲唔同嘅學習機會，就可以加強小小豬鐘意閱讀興趣，唔係一件非常之好嘅事嚟，所以你話點唔可以讚吓依個廿四孝好爸爸呢！