初嘗IKEA兒童樂園

29 NOVEMBER 2014(SAT)

MEGA BOX入面嘅IKEA有個地正嘅兒童樂園，小朋友可以入去玩，爸爸媽媽就可以輕鬆咁睇傢俱。

其實依個好玩地方都開左有一大段時間，成日都好想帶小小豬入去玩返轉，不過次次都人山人海冇機會玩到，今日終於係冇預期之下，小小豬可以入去玩個飽啦~

今日係星期六，原先係應該要去上足球班。不過當我地準備出門口時，見個天落起毛毛雨，所以都唔敢帶剛病好嘅小小豬去上堂，就係咁我地就請假一堂，見有時間就改去MEGABOX行一轉食晚餐啦！

食完晚餐行過IKEA嘅兒童樂園，見到人流唔太多，所以就八卦行過去睇吓仲有冇位~

出奇地今日真係冇乜人，當然即刻去拎完張籌先啦~

拎埋張入場表格填~

之後我地行一轉IKEA，就可以入張玩啦！

雖然小小豬都係第一次入去玩，不過之前經過都有係啲窗口位望過入去，所以根本上佢都知道入面有咩玩。所以今次一入去，小小豬當然係直接衝去波波池啦~

見小小豬係入面玩得咁開心，我就同大肥豬繼續行IKEA。行左十五分鐘再返嚟望吓隻懶玩豬。點知唔見左佢，原來小小豬已經改左地頭，行左出去玩佢依期勁鐘意嘅火車呀！

一有車玩佢就變得沈迷了，所以之後啲時間全程都玩火車~

其實除左波波池同火車之外，入面仲有煮飯仔，同有啲珠珠遊戲，所以種類都幾多，男仔女仔都一樣啱呀~

話咁快四十五分鐘就到，小朋友們就可以著鞋仔等家長接啦~

因為到左可以接小朋友時間，大肥豬去左洗手間，我就諗住先去接小小豬先。因為我冇接小朋友回條，就連小小豬係入面不停叫"媽咪...媽咪"，負責姐姐都唔俾我接，最後都係要等大肥豬嚟到，出示張回條先可以帶小小豬走啦~

哈哈哈...依樣要讚一讚，認紙唔認人做法真係唔錯，真令人好放心交底小朋友入去玩呀！

依個百厭小小豬係入面玩得不知幾開心，一行出嚟就問我幾時可以再嚟玩，真係俾佢笑C。

可能因為係免費關係，平日我地星期六日嚟睇都話要等四個鐘先可以入去玩，今日我地都算係好好彩，所以都唔敢講定幾時可以再嚟，只可以同小小豬講：等下一次好運日，我地就可以再嚟玩啦！

象仔燜燒杯@杞子紅棗陳皮茶

27 NOVEMBER 2014(THU)

上次試象仔杯時，我就整左杞子元肉紅棗茶(按此重溫)，今日我又試整另一款好啱女性係冬天飲嘅茶，就係杞子紅棗陳皮茶啦~

其實依款茶係我姨媽教我煲，事緣我尋日姨媽摸到我隻手好凍，佢就話我係血氣唔夠，就叫我用杞子、紅棗同陳皮嚟焗水飲，仲叫我連飲幾日，成個人就可以夠血又夠氣，咁就唔洗怕凍。

係我細問之下，原來杞子、紅棗配元肉就只係補血，所以好啱女仕係生理周期後飲。而改配陳皮的話，就變成了補血氣，加上陳皮又可以化胃氣，啱任何時候飲用。

既然有姨媽教路，所以今日就準備好材料焗嚟等自己暖暖身啦！

將一片陳皮浸透去囊，然後切絲，咁可以等啲陳皮味易出啲~

四粒紅棗去核，然後連同十數粒杞子一齊洗淨~

將所有材料放入象仔杯中~

加入滾水焗20分鐘~

話咁快就有得飲啦~

我之後仲反覆沖泡左三次，係一個早上飲左三杯，飲到第三杯個味道都仍然係好有味，所以話象仔杯真係唔錯，既方便又可以焗到好嘢飲呀！

味道方面又如果，我個人覺得杞子、紅棗配陳皮係好飲啲，雖然係少左元肉嗰一種甜味，不過對於唔多鐘意飲太甜嘅嚟講，依個入口就會覺得好清，而且飲都會有那一種陳皮嘅香味，所以真係唔錯，值得同大家推薦一吓呀！

再戰HELLO KITTY CAFE專櫃

25 NOVEMBER 2014(TUE)

突然間好想甜甜地食件蛋糕，但由於時間所限唔可以靜靜地坐定定咁蛋糕，所以就去左SOGO地庫嗰個HELLO KITTY CAFE專櫃食個小茶餐，等自己開心一吓啦~

其實自新開張時嚟過一次潮聖之後(按此重溫)，平日都比較少出嚟銅鑼灣，所以都冇乜機會嚟呀~

聖誕將至，專櫃都已經擺放左好多HELLO KITTY嘅聖誕佈置，好靚呀...唔知邊度有得買呢~

嚟到當然係最關心有啲咩靚蛋糕食啦！除左一啲舊有款式外，今次見到啲新款CUP-CAKE，件件都好靚，好想試晒佢呀~

仲有唔少得五顏六色嘅馬卡龍啦~

考慮左好耐，終於決定ORDER左一件玫瑰草莓慕絲蛋糕~

蛋糕內嘅CREAM帶有微微嘅玫瑰味，再加上啲個草莓醬，個味又幾夾，蛋糕層都好鬆軟，最好就係一啲都唔甜，真係唔錯呀~

另外我仲叫左一粒紅桑子馬卡龍~

其實之前都試食過佢地出味嘅馬卡龍，都覺得味道唔錯，比起坊間其他嘅馬卡龍，佢地真係一啲都唔甜，非常啱我口味呀！

依個紅桑子味就帶有少少酸酸的，食落都好醒胃呀~

最後就當然唔少得飲味啦，我叫左一杯白色戀人(即係白朱古力奶)，我仲即場睇住師傅整添呀~

完成啦...真係有啲唔拾得飲呀~

一向白朱古都會令人覺得好甜好奶味，不過依一杯我又唔覺，仲有好香嘅朱古力味添，微暖飲落肚，真係令人都舒服啲呀！

雖然只係用左二十多分鐘去享受我嘅好味下午茶，不過輕輕鬆鬆真令人舒服，可以有足夠能量去繼續我嘅忙碌！

麥當勞兒童愛心馬拉松 - 馬拉松訓練日

23 NOVEMBER 2014(SUN)

謝謝麥當勞叔叔邀請，今日我地三口子去參加兒童愛心馬拉松十週年嘅馬拉松訓練日，同一班小朋友仔一齊齊學跑步，為參加馬拉松作好準備呀~

去到目的地，大會就為我地三口子準備好戰衣。一件靚靚TEE同埋麥當勞叔叔愛心紅白襪‬~

換好戰衣嘅小小豬係唔係好有型呢~

大家換好衫，當然唔少得嚟張親子相先啦~

等活動開始之前，我地見到魚子醬，兩個小朋友好似好FRIEND咁哦~

準備開始啦~

首先就由主持同麥當勞叔叔介紹一吓兒童愛心馬拉松歷史~

之後就由麥當勞叔叔帶領在場各位大小朋友一齊跑，作為簡單嘅開幕禮~

繼續就係大家最興奮時刻，就係可以同麥當勞叔叔一齊影相啦~

休息一陣，小朋友們就開始進行馬拉松訓練，大會請了香港半馬拉松紀錄保持者兼長跑教練家豪SIR，教導小朋友正確的跑步姿勢~

首先就WARM-UP吓先，等小朋友們扮吓火車行吓先~

WARM-UP完小朋友們就乖乖地企定定聽家豪SIR講解~

之後就教小朋友做啲熱身運動，小小豬做體操一向都比較差，好在助教姐姐都好有耐心咁教小小豬做動作，都總算叫做到啦~

學埋最後一個跑步嘅手勢，就可以開始跑步啦~

聽到家豪SIR發施號令，小朋友們就起勁地跑，個個都有板有眼呀~

睇吓小小豬跑得幾起勁~

來來回回跑左幾次之後，訓練部分就完結，接下來就係由麥當勞叔叔同各小朋友做啲拉根運動~

之後麥當勞叔叔仲同小朋友一齊傾計添~

完仍左整個訓練之後，大會仲為我地準備了遊戲卷，可以去玩攤位遊戲啦~

雖然小小豬跑左大半個鐘，見到都攰攰地，不過有得玩遊戲佢就即刻精神晒，首先就去蹦蹦跳先~

之後就同大肥豬一齊玩二人三足~

最後就去玩渣車比賽，不過依個GAME嘅亮點就係大肥豬，睇佢陪個仔玩就真係咩造型都得呀~

哈哈哈...有得扮渣車依個車怪小小豬又點會唔開心呀，佢仲玩到唔願走添呀~

其實仲有一個跳豆袋遊戲，不過小小豬唔肯玩呀~

玩完遊戲仲可以去換禮物，真係實在太好啦~

小小豬今日真係滿載而歸啦~

今日最樂意又係影得最開心嘅，相信都一定係依一張相，因為依個好勝嘅小小豬話佢自己跑得好叻叻，得到第一名哦....真係俾佢激C呀~

活動嚟到最後就係由大會為我地準備茶點，等一班大小朋友嚟休息醫吓肚先~

玩左成個下午嘅小小豬又熱又攰，就俾佢食杯雪糕開心一吓啦~

原來麥當勞嘅餐紙都因應麥當勞兒童愛心馬拉松換左新款，我個人又幾鐘意今次個設計，好WARM呀~

「第十屆兒童愛心馬拉松」已經開始報名啦，有興趣參加嘅朋友仔除左可以去麥當勞網址下載表格之外，亦都可以去任何一間麥當勞索取，即場報名呀！

我同小小豬都會去參加依個活動，唔知會唔會見到你地呢？

明年1月31日大家一齊嚟 愛跑 愛世界！

 

 

More Information :
Website：http://www.mcdonalds.com.hk/ch/social-responsibility/kidathon.html