迎月嘉年華

7 SEPTEMBER 2014(SUN)

今日係迎月，所以屋企附近個社區中心攪左個『迎月嘉年華』，見近近地加上我地又冇特別節目，所以就約埋朋友仔去玩一轉啦~

由於都係第一次去，所以都唔知個環境係點。原來係個社區中心大堂進行活動，場地就好似細左啲啲，不過大家都算守規舉乖乖排隊，加上又係免費任玩，所以都叫做可以接受啦~

可能因為場地有限，所以都只係有四個攤位遊戲。不過小朋友嚟講幾多個係唔重要，最緊要係有得玩嘛！

首先就係去玩拋銀仔，拋中中秋節圖案就有得蓋印仔換禮物。雖然小小豬最後都係拋唔中，不過攤位哥哥好好人，照蓋印仔俾佢呀~

之後就玩射槍槍~

砌圖~

仲有玩推波波添，不過依個攤位小小豬唔識玩，最後要大肥豬幫手呀~

我地仲去玩估燈迷(當然係我地啲大人去諗啦)，猜中左就有獎品啦~

睇吓今日全日小小豬幾豐收~

玩完攤位遊戲，兩個小朋友仲意猶未盡，最後就手拖手咁返我地屋企繼續玩過啦~

雖然個嘉年華又真係細左啲啲，不過唔覺唔覺我地係入面都玩左差唔多個半鐘，就係咁我地又過左一個簡單又開心嘅下午天啦！