兒童故事時間

6 SEPTEMBER 2014(SAT)

唔係大肥豬帶我地去，我都唔知道原來公共圖書館每星期都有兒童故事時間，既有得聽故事，又有得小手工，所以我地就帶左小小豬去玩啦~

大肥豬話其實公共圖書館一向都有依個兒童故事時間，會有位姐姐同小朋友一齊講故事。不過之前一向我地都冇留意，佢就因為有一次路過見到，見個活動好似幾好玩，所以就打算帶小小豬去，既可以聽故事，又可以同多啲小朋友一齊玩啦！

不過，活動名額有限，所以要一早去圖書館拎籌。依個重任當然要交俾大肥豬啦~

活動地點就係圖書館內嘅活動室~

哈哈哈...我偷偷地望入去，個環境都唔錯哦~

原來依個兒童故事時間就係小朋友自己入去，同故事姐姐仲有一名工作人員係活動室入面聽故事玩遊戲，家長就係外面等。

始終都係第一次參加依啲活動，所以我同大肥豬係活動室外都有少少擔心，唔知小小豬係入面玩成點。

活動結束啦，小小豬第一個反應就話玩得好開心，仲即刻俾佢個手工我地睇添~

之後見故事姐姐有時間，就問吓佢小小豬係入面個情況係點啦。好在姐姐都話小小豬係入面冇攪攪陣，仲好專心咁聽佢講故事，仲話佢表現唔錯添。當然，最開心嗰個一定係大肥豬，因為係小小豬入去玩嗰一小時佢就緊張一小時嘛！

既然小小豬咁鐘意，既有得聽故事，又可以同其他小朋友一齊玩，最好就費用全免，所以大肥豬都話嚟緊都會帶小小豬嚟多啲呀！

唔止依間圖書館，其實每一間圖書館都有同類型嘅兒童故事時間，不過時間就可以會唔同。如果大家有興趣，都可以問一問你附近嘅圖書館，如果時間啱的話都可以帶小朋友去聽故事玩吓呀！