攀石初體驗

24 AUGUST 2014(SUN)

今日小小豬又有一個好好嘅活動體驗，第一次去玩攀石！

雖然爬嘅時候不停"WeWa"大叫，不過都叫做肯嘗試同參與啦~

其實之前我都有諗過帶小小豬去學攀石，因為覺得攀石依個活動對小朋友嘅手腳協調、自信心同埋練習膽量都好有幫助。

我成日都以為只係康體渡假村先有依啲活動，如果唔係SooExplore嘅哥哥邀請試玩，我地都唔知原來依家係市區都有得玩，真係非常感謝哥哥為我地安排呀！

今次SooExplore哥哥安排我地去學攀石嘅地方就係位置觀塘工業區嘅GONATURE~

睇介紹時知道GONATURE係全港最大6,500呎抱石場，一入到去睇又真係幾大哦~

每一個英文字就代表一個攀道，可以因應個人訓練，選擇不同攀道挑戰自己~

好啦...去到小小豬玩攀石嘅兒童訓練場啦~

首先就跟教練姐姐做熱身先~

做完簡單熱身，就可以入攀石做訓練啦！首先教練姐姐就教小小豬感受吓攀石嘅動作，先教小小豬係攀石場內打橫行一次先~

每行一步教練姐姐都好細心咁教小小豬應該企邊粒石仔，捉邊粒石仔，應該係點行過去，所以話咁快小小豬就明白左，好快就可以打橫行到一段路啦~

既然已經知道個技巧，咁就可以向上發展，小小豬穿上安排措施，可以向上攀啦~

初時幾步都好似好叻咁哦~

不過攀多幾步就開始唔得，喊晒口話驚高又驚跌，佢個攪笑樣真係笑C大家呀~

最後一個肉赤嘅DADDY忍唔小小豬個慘樣，話不如佢做一次示範俾小小豬睇。睇吓放左小小豬落嚟佢幾興奮~

哈哈哈...依一個係小朋友場，對大肥豬嚟講又點會有難度，所以三兩吓就攀到最高啦~

其實小小豬唔係做唔到，我地覺得佢只係自信心不足。當佢見到大肥豬好快完成之後，佢就好似多番好多信心，所以又可以再嚟過啦~

今次真係好左好多，自己係威係勢咁攀到一半啦~

不過去到一半，佢又開始驚驚地啦~

其實小小豬可以自己攀到一大半，我同大肥豬都已經覺得佢好叻仔，不過既然攀左一半，所以最後大肥豬就攀上去陪佢完成埋佢啦~

睇佢有大肥醋陪，即刻笑晒口啦~

不過落嚟時唔知係唔係見到高，又嚟依個攪笑驚嚇樣，真係好好笑呀~

完成左依個攀道之後，大肥豬唔好一次迫小小豬咁利害，所以都冇再迫佢攀多一次，就等佢自由發揮一吓，係小場內自己鐘意點攀就點攀啦~

俾佢自由發揮佢又好似做得幾好，仲可以自己一個攀左一大半，今次冇大叫，仲好開心咁攀添呀~

其實今日小小豬依個表現真係令我有啲起出望外，因為最初時我都係擔心小小豬唔肯去試會勁扭計。不過去到佢又好似好ENJOY樣，又好聽教練姐姐嘅說話。雖然爬嘅時候不停"WeWa"大叫，又好似好驚咁，但都叫做肯嘗試同參與啦！

依個小小豬仲越攀越興奮，最後仲爬到唔願走呀~

最後都真係要再一次多謝SooExplore嘅哥哥邀請，小小豬先有得體驗唔同種類嘅活動。佢仲好有耐性咁為我地安排，改期一次又一次，真係麻煩晒佢呀！

其實SooExplore仲有好多活動推介，有動又有靜，希望下次再可以參加佢地舉辦嘅活動啦！

 

 

More Information :

SooExplore
Website：http://www.sooexplore.com
Facebook：https://www.facebook.com/SooExplore

GONATURE
Website：http://www.gonaturehk.com
Facebook：https://www.facebook.com/GoNatureHK