49個月大的小小豬

10 SEPTEMBER 2014(WED)

今日係十號，剛好係小小豬又大一個月嘅日子，已經係49個月嘅小小豬今朝起身竟然識得自動自覺係書包拎課本出嚟溫習呀~

由於每日放學返嚟到要準備食晚餐、洗白白、做功課、講故事時間....所以其實小小豬可以自己玩嘅時間都唔算多。我一向都唔算係怪獸家長，都唔建議迫得太利害，所以每日早上飲完奶之後，我都會俾小小豬自由活動時間，等佢自己玩鐘意嘅嘢，咁先可以營造開心嘅童年嘛！

今日如常地一早起身，小小豬就去玩玩具，我就入廚房準備午餐，突然間聽唔到小小豬嘅說話聲，我就即刻走出客廳睇吓咩事。(因為小小豬係一個唔停口嘅小朋友，就算佢自己一個人玩都可以講嘢講足全程。突然間冇聲當然係有啲唔對路啦)

原來依個時候嘅小小豬係書包拎左本課本出嚟，好專心咁睇緊學校嘅課本呀~

見佢咁乖仔，我即刻放心晒。依個時候我當然係唔阻止佢，等佢繼續做乖乖啦！

正當我準備入廚房繼續準備午餐時，就係咁俾小小豬發現左我，叫我陪佢一齊讀書，仲叫我扮小朋友，等佢扮老師用國語教我讀書添。依一刻嘅小小豬又真係似模似樣，所以我都陪佢玩左一陣扮老師啦！

其實見到小小豬依個動作，我都真係幾開心，因為我地嘅努力係真係冇白費，睇見小小豬由當初唔鐘意睇圖書，到依家識得自動自覺，發自內心咁去做，又真係一個好大嘅進步，當然...亦都係大肥豬嘅堅持同耐性，小小豬先有依個重大改變呀！

希望依一個好開始可以繼續KEEP住，到佢將來返小學...中學...都會好似依家咁自動自覺去溫習啦！