Kinseymama's LIFE: 9月 2014

2014年9月30日星期二

試用：愛家仕™防蟎枕頭套

28 SEPTEMBER 2014(SUN)

多謝公關姐姐邀請，我地一家可以試用愛家仕™防蟎枕頭套，睇吓個小小豬見到個新枕頭幾開心(哈哈...個傻豬仔見個枕頭唔同左就以為係新啦)~

老實講，自小小豬六個多月嘅時候開始起濕疹之後，我地都有諗過買啲防塵蟎嘅寢具俾小小豬，希望可以減輕佢濕疹嘅情況。

不過當時我地又唔識，去到百貨公司見到又有好多唔同牌子，有平又有貴，個價錢相差都真係幾大，所以係我地唔識買嘅情況下，最後我地都係打消左依個念頭。

所以今次公關姐姐問我有冇興趣時，我都即刻答應。唔止小小豬，就連我同大肥豬都係非常啱用，因為我地兩個都係鼻敏感人仕嘛~

試用前當然要了解多啲先，尤其係我俾小小豬用嘅，一定要更加小心嘛！

原來防蟎寢具有兩大類，化學防蟎和物理防蟎。前者利用化學劑拘趕塵蟎，但使用者皮膚會與化學物長時間接觸；後者以材料把塵蟎敏感原分隔開。塵蟎的排泄物為水溶性，用55˚C水溫清洗，就可以把塵蟎殺掉，而且把敏感原洗掉呀！

而愛家仕™ 防蟎寢具選用寢具就係選用美國專利技術 #6,277,770精密織布，透氣孔徑平均小於6微米，有效阻隔塵蟎及其敏感原。物理性能防蟎，無添加化學劑，擁有Oeko-Tex® Standrad 100認証。

織布由超細纖絲編織而成，具高透氣性能，不會有漲起感覺，轉側時也不會有噪音，柔軟舒適。透濕、排汗、乾爽舒服，不會有局促和悶熱感覺。此外，聚酯長纖，結構耐用。可用60℃高溫洗滌，殺死塵蟎，洗掉敏感原~

打開個枕頭套，摸上手感覺布料都厚身，但個質感都好順滑，感覺都好舒服呀~

只要把愛家仕™ 防蟎枕頭套直接套在枕芯上，把拉鏈拉至盡頭密封就完成啦~

我地係用開係"S"字頭嘅枕頭，內有一個枕芯套的，不過由於我個枕芯套剛剛拎左去洗，所以今次就需要連埋個新枕頭袋一齊放入防蟎枕頭套內。等下次洗好左之後，就可以只放枕芯入內啦~

我地三口子試用左大約一星期，暫時係小小豬身上就未見有明顯嘅成效，不過啲濕疹就冇加重到。但佢就好鐘意依個新枕頭，話白雪雪好靚好舒服哦(真係俾佢笑C)~

不過係我身上就初見成績，因為我每朝起床都一定例必打一輪乞嗤先可以落床，但依個星期明顯啲乞嗤次數有減少，希望KEEP住用就可以唔洗再朝朝包雲吞啦！

整時愛家仕™防蟎寢具只可以係網上購買，如果大家有興趣可以去佢地網址睇吓，因為除左枕頭套之外，仲有其他寢具用品可以購買。

More Information :
Website：http://aegisabb.com/
Facebook：https://www.facebook.com/AegisABB
Youtube Advertorial: https://www.youtube.com/watch?v=PRQ28pIJO5A&list=UUDUNB034g-nNElS_0I0iYfg

2014年9月29日星期一

MY MASTER ?

27 SEPTEMBER 2014(SAT)

早前見ILLUMA FACEBOOK有一個Eden 種植體驗遊戲，只要完登記之後，就會得到限量嘅個人化盆栽。

我依個師奶仔見有著數當然唔執輸玩埋一份，等左都有幾個月，終於今日收到盆栽啦~

仲包埋一個靚靚鏟仔~

仲有埋啲泥同種子添~

我覺得最特別都有個小牌，有小小豬張相係上面，原來個人化就係指依個相片牌。雖然都好特別，但如果張相可以印得清啲，咁就仲正呀(免費嘢就唔好要求咁多啦...哈哈哈)~

依家有材料齊備，等我搵日同小小豬一齊種蕃茄先得！

當然...我今日嘅分享主角唔係依個小盆栽，係要同大家分享吓係我收件嗰一個過程。當我同大肥豬講返時，佢可以足足笑成五分鐘，仲叫我一定要寫BLOG記錄一吓。

好啦...既然係一件好笑事，我當然好樂意同大家分享，希望為大家帶來丁點快樂。

小盆栽係由速遞公司直接送上我地屋企，所以當我收到速遞叔叔打嚟時，我都留左係屋企等收件。

因為當時小小豬因為唔舒服瞓左，為免速遞叔叔送嘢嚟時會嘈醒小小豬，所以我都係客廳等。當我聽到門鐘時，即刻以最快速度開門收件，點知一打開門速遞叔叔就話：你係唔係幫你MASTER收件呀？你識簽名嗎？

嘩.....聽到嗰一吓內心真係無名火起，雖然我係屋企係著得比較隨便，不過點睇都唔似工人姐姐呀！雖然係嬲嬲地，不過我都係笑住同速遞叔叔講：份禮物嘅收件人係寫我名，麻煩你送上嚟俾我呀！

之後，速遞叔叔就全層笑笑口咁同我交收，不過佢嘅笑容都有少少尷尬囉...哈哈哈！

阿Q啲咁諗，其實速遞叔叔又真係冇講錯，因為我嘅MASTER咪就係盆栽嘅小主角 - 小小豬，我又真係幫緊佢簽收哦，所以呢.....都係得啖笑啦！

不過，依個攪事嘅大肥豬叫我之後係屋企都要著好啲，咁就唔會有同類事情發生哦......真係俾佢激C呀！

2014年9月28日星期日

芝士烤薯角

27 SEPTEMBER 2014(SAT)

今日下午係屋企冇乜嘢做，口痕痕咁想整啲嘢食，搵吓屋企啲材料，所以我地就嚟親子廚房整芝士烤薯角，好味到小小豬話有兩個GOOD呀~

只需要依四樣材料，真係好簡單~

首先洗乾淨粒薯仔，由於一陣係會連皮一齊食，所以一定要擦乾淨啲呀！

然後就可以切粒粒啦~

切嘅時候盡量都唔好太大舊，如果唔係就比較難熟啦~

之後就加入適量嘅椒鹽，盡量令到每粒小薯角都有椒鹽係上面呀~

加少少牛油再攪拌一吓~

最後一個步驟就係放芝士，由於我屋企只有片片裝芝士，所以就需要整碎佢平均咁放係啲薯角上面~

可以放入光波爐，以200度光波20分鐘~

為食豬等食等得幾心急~

哈哈哈...小小豬洗完白白之後，就係出爐之時啦~

睇吓個為食豬食得幾滋味兼肉緊...哈哈哈~

其實依個烤薯角都可以有好多整法，可以因應個人口味嚟加入唔同嘅調味，好似可以加啲蜜糖、黑胡椒、蒜鹽、香草....等等，咁就可以成為自已最愛嘅好味下午茶啦！

2014年9月27日星期六

愛吃洋葱的傻豬仔

26 SEPTEMBER 2014(FRI)

最近我又發現左依個怪怪嘅小小豬有一個新愛好，就係非常愛吃洋葱，睇佢真係食得好滋味咁呀~

可能係我唔鐘意食洋葱關係，所以我都好少煮，但點解小小豬又會愛上呢？

哈哈...咪就係因為有一次我地去左吉野家食晚餐，叫左一碗牛肉飯俾小小豬食，佢竟然完全冇抗拒啲洋葱，仲同我地講話好好味，自此就愛上左。

我今日問佢想食咩時，佢就話想食洋葱牛肉飯。既然佢咁鐘意又咁主動，所以就今日午餐煮俾小小豬食啦！

望到碟洋葱多過牛肉嘅餸，小小豬都已經好驚喜啦~

睇佢食得幾狼C~

佢真係好鐘意食，睇佢食到最後一塊都唔放過就知啦~

依個小小豬又真係一個怪小朋友，既之前鐘意食中成藥多過西藥之後，今次又嚟鐘意食洋蔥。

平時叫佢食啲菜都好難，如果唔係切得碎碎咁混入埋啲飯度，佢都唔肯食呀！

其實啲洋蔥味又真係怪怪，唔好話我，就算好多小朋友都唔鐘意食，真係唔明白點解小小豬會咁鐘意食。

不過洋蔥都係啲有益嘅食物，既然小小豬又鐘意食，所以食多啲都冇壞呀！

2014年9月26日星期五

蘋果雪梨茶

26 SEPTEMBER 2014(FRI)

一過左中秋節，就即係開始踏入秋季，所以最近啲天氣都開始乾燥，所以又係時侯要煲啲清熱滋潤嘅涼茶，所以今日就雪梨蘋果茶啦~

2014年9月25日星期四

第一次尿床

23 SEPTEMBER 2014(TUE)

小小豬經過都有半年嘅戒夜片時間，終於都有第一次尿床。不過戒片咁耐先嚟第一次，我都已經覺得小小豬好叻仔啦~

自係四月時同大家分享過究竟幾時幫小小豬唔著片片瞓覺時(請按此)，我同大肥豬都覺得係時候開始進行依個戒片大行動，所以亦由嗰時開始，我地都冇同小小豬著片片瞓。

坦白講，雖然我都買左好多防水床罩以備不時之需，但都總係好擔心佢成日都尿床，咁我又要日日換床單.....即係驚左。不過隨著依半年來小小豬都好叻仔，都未試過尿床，所以我都好放心。

其實以小小豬四歲仔嚟講，可以咁順利戒到片片，今次都只係一次失手，所以都係可以原諒呀！

雖然今日係發生左尿床事件，不過我一啲都冇唔開心，仲覺得好攪笑，攪笑係因為小小豬同我嘅對話，亦都係因為我地嘅對話令我覺得小小豬真係大個仔，唔再係BB，因為識得口花花逗我啦，所以我都唔可以唔出返篇文嚟記錄下。

小小豬：唔好摸啦！(因為一起身我覺得唔對路，係度摸緊佢條褲仔)
我：仲乜唔摸得呀！
小小豬：(好老積兼有啲自信MODE)係...我唔小心...我唔係專登呀....我癩左尿尿，我下次唔會呀，我咁愛你，俾次機會我啦，下次我一定會做好啦！
我：咁好啦...既然你知道唔啱，咁我原諒你一次啦，下次再癩尿尿，我會唔開心呀！
小小豬：(高八度兼成個人抱住你)得...我唔會再癩尿尿，因為我係四歲哥哥嚟嘛！

其實有時對住小小豬都真係唔知好嬲定好笑，唔知佢係邊度識得講埋啲逗你嘅說話，當聽到佢話我咁愛你、我錫晒你...等依啲冧C人說話，又或者失驚冇神走過嚟攬實你，真係即刻心都軟晒，所以話佢係人仔細細，都真係好識睇人微頭眼額。

不過另一方面我又覺得小小豬係自信心方面又真係大左，比著以前佢做錯事，佢嘅做法只係會躲係你後面，蚊子聲咁唔知講咩嘢咁逃避你問題。

我都曾經幻想過小小豬第一次尿床時個樣，今次真係同我想像嘅係完全唔同，小小豬既大膽回應佢尿床，又可以有自信話下次唔會，所以都係一大進步呀！

做媽咪最開心就係睇到自己小朋友不斷有進步，雖然好多小朋友可能比小小豬仲叻仔，一早就戒晒片，所以對佢地嚟講尿床都係一件小事。不過對我同小小豬嚟講就係一次進步嘅表現，希望小小豬可以繼續努力，係各方面都不斷有進步啦！