迪迪尼生日PARTY

10 AUGUST 2012(FRI)

 
小小豬兩歲生日依個大日子，當然要大事慶祝一吓啦！

其實今年因為小豬媽唔舒服，我原本都唔打算入迪迪尼，不過見小豬媽精神都好好，小豬爸又想等小豬媽開開心心玩返日，所以最後都係決定一家人入去迪迪尼酒店食自助餐為小小豬慶祝。

為左小小豬唔好夜晚扭計，所以我地就佢晏覺瞓耐少少，不過亦都因為依個原因，我地遲左十五分鐘先入到去。

係大家都出左去拎嘢食時，小小豬都未坐定定，MICKEY同MINNIE就行左嚟同我地影相啦(就係因為咁..都係得我地三口子影住先)~
 

之後我地就出去拎嘢食，睇吓個為食豬，一見到士多啤梨就即刻食啦~



 

食左一陣間，MICKEY就嚟同我地切蛋糕啦~

 

小小豬食個雪糕筒幾滋味~
 

 

仲同小豬媽嚟個深情KISS KISS添~

 
到PLUTO嚟同我地影相啦~

 

有個BABY係度偷飲檸檬茶呀~

 

就係因為玩緊杯檸檬茶，所以唔肯乖乖同小豬爸小豬媽影相~

 
幾經辛苦先引到個傻仔影到一張，真係激C人啦~

因為之前MICKEY同MINNIE嚟嘅時候大家都去左拎嘢食，所以就同個職員講，最後都安排佢地嚟多次同大家影相~

不過話時話，今年食得真係唔係咁開心，依間餐廳嘅安排差左。仲記得上年啲卡通人物嚟同我地影相時，佢地都好熱情，會同小小豬玩一陣先影，仲可以慢慢咁同我地一個個人，仲一個人物行幾轉嚟同我地影呀。

相反今年，好似趕頭趕命咁，如果唔係我要求，MICKEY都唔會再行嚟我地張枱，我地三口子影完之後，就即刻叫晒我地影合照，就連小豬媽想同MICKEY單人影都冇機會。最慘就係同我地切生日蛋糕嗰隻MICKEY，冇熱情我唔怪佢(可能辛苦)，不過洗唔洗企到咁開，話晒都係小小豬生日切蛋糕時刻，係唔係可以同佢玩多一陣，影多啲相呢！

作為FANS嘅我，當然好鐘意入嚟迪迪尼慶祝，有得食又可以舒舒服服等卡通人物嚟同我地影相同玩。不過經過今次，都真係要諗諗出年會唔會再入嚟！
 
唉...呻完，講返啲開心事先，生日當然唔少得有生日禮物啦！首先就係小豬爸同小豬媽送嘅生日大大大大大利是(啲字係小豬爸寫嘅，係唔係好靚呢)~
 

 

仲有嘉汶表姨送嘅學習教材~

 

 

同埋舅父舅母送嘅MICKEY雨具~

 

 

隨著生日過去，小小豬踏入兩歲仔啦，希望佢聽聽話話、健健康康、最重要係開開心心，做一個人見人愛嘅好寶寶！