開學啦

13 AUGUST 2012(MON)

 
萬眾期待嘅日子終於來臨，今日就係小小豬第一日返學嘅大日子啦！

今個星期都係親子課，所以今日我就同小豬媽一齊陪小小豬上堂，睇吓佢著住套校服幾醒目~

睇吓小小豬一見到學校就自己行左入去，好似好鐘意返學咁哦~

入到學校就返課室自己拎玩具玩啦~

其實今日都係返一個鐘頭，等小朋友感受一吓學校生活。小小豬上半部都做得幾好，識得自己拎玩具返埋位玩，又識得收拾玩具放回原處(當然就唔係全程玩同一種玩具，仲有時唔坐底要起身玩)，不過都係冇扭計嘅。當做體操時都有趕住老師一齊做(不過就比較慢左兩拍)，玩大型車車時又肯自己去玩。

但一到下半部分，入課室聽老師講故事時就開始出事，班入面十個小朋友，都只係得三個需要家長陪入課室(當然係有我份啦)，依個小小豬要陪都不止，仲要坐上我大脾上面，痴到實一實，真係俾佢激C呀！

之後食茶點都叫做OK啲，不過因為依個為食豬實在太為食，一見啲餅餅就要即刻食，未識等埋其他小朋友(已經係屋企教過好多次，不過都仍然係咁，真係冇佢收呀)。

整體上今日小小豬表現都真係麻麻地，唔知係唔係全班佢最細嘅關係，感覺上其他小朋友真係叻好多，又唔見佢地有喊同扭計，又好似識講好多嘢咁，都有一刻驚小小豬同其他同學未必可以一齊玩。

不過，今日都係第一日返學，嚟緊仲有成年時間，可能到最後小小豬會好叻叻，同其他同學仔會一齊學習得好開心啦！

希望小小豬可以快啲適應，鐘意校園生活，咁就可以開開心心咁學習啦！