BB展

4 AUGUST 2012(SAT) 

因為YAHOO BLOG關係，令美素佳兒嘅公關姐姐有留意我依個小小嘅BLOG，所以就送我四張入場卷，邀請我入去今年嘅BB展，多謝呀~

其實BB展我都真係好少去，對上一次入都係因為嗰次小小豬有份參加爬行比賽，所以先會入去玩。因為真係好怕迫人嘅感覺，不過今次有免費門票，所以我地就一行五人入去行個圈，睇吓有冇啲平嘢買吓啦~

未入場見到雅培BEAR BEAR，我又點會放過依個機會影吓啦~

得到美素佳兒嘅邀請，當然第一站就要去參觀一吓先啦~

公關姐姐真係好好，雖然佢知道小小豬唔係食佢依一隻奶粉，不過佢都好細心咁向我講解佢地奶粉嘅成份同埋新改良嗰個包裝~

奶粉成份我想都唔洗我點講解返，因為每一位媽咪都有佢地心目中認為好嘅奶粉，所以我就唔多介紹，不過我想講嘅就係佢地個新包裝~

我覺得佢地依個新『保衛蓋』真係做得幾好，入面有一個密實扣，蓋好左之後就會CLICK一聲，咁就可以等我地知道已經蓋好左，唔怕漏氣。另外我覺得設計最好就係可以將個量匙固定係個架，唔洗係啲奶粉入面周圍找個匙，乾淨好多啲。佢地仲引入左日本奶粉嘅設計加設左一塊平片，可以比較易撥平同量奶粉。

整體上新裝都真係唔錯，咁沖奶應該會方便好多，奈何小小豬食唔到依隻奶粉(因為佢啲濕疹仲未清得晒，唔敢隨意幫佢轉呀)，所以我就試唔到依個新設計。希望其他奶粉商都可以參考吓啦！依個新設計係八月下旬就會推出，有興趣轉飲或者飲開嘅媽媽記得到時買嚟試吓個新設計啦！

除左介紹之外，公關姐姐仲送左一大袋禮物俾我呀~

真係好豐富呀~

當中仲有陳倩揚親筆簽名本新書添~

啲禮物都真係好多種類，尤其係個媽媽袋，真係好啱用呀！因為有部分係FOR孕媽媽同初生媽媽參考，所以我已經將佢轉贈左俾我朋友。另外，佢仲送左四盒八包嘅3號仔奶粉俾小小豬，不過因為小小豬唔係飲依隻奶粉，所以如果有媽媽啱用，我可以轉贈呀~

不過因為數量都多，我唔想郵寄，所以只可以安排嚟筲箕灣拎，有興趣嘅媽媽請私人留言俾我啦！(有好嘢唔好浪費嘛！)

參觀完美素佳兒攤位，我地就周圍行吓，小小豬仲好留心咁周圍望呀(其實係八卦豬就真)~

仲係場地入面拎左個汽球玩添~

我見好多人都一袋二袋，拎左好多贈品，唔知點解我地係冇乜點拎，啲攤位實在太迫人，我地都唔敢迫入去。不過，我地有小小收獲，就係買左十幾包清潔棉花、兩包游水片片、兩盒開奶茶仲有一盒保嬰丹，比出面係平啲，咁都叫做唔空手而回(因為返到屋企已經俾大肥豬收埋晒，所以冇影相呀)。