買齊晒...準備返學啦

4 AUGUST 2012(SAT) 

係BB展我地唔係留左好耐，因為要趕去下一個節目，就係去同小小豬買校服啦！

依幾套就係小小豬嘅校服，型唔型呢？

校服~

運動服~

冷外套~

其實我都真係算遲，小小豬八月中就要返學，我都今日先抽到時間同佢出去買，都真係有一刻擔心冇小小豬個SIZE，好在都仲買到，即刻放心晒！

依一間校服公司可以話係自助式，佢擺左唔同學校嘅校服同尺碼係一個位置，要你自己揀啱個SIZE嚟試(好在有帶埋小小豬嚟，如果唔係都唔知點試)。

就係依一刻，眼前嘅小小豬著好晒成套校服係我面前，雖然唔算係整齊(因為套衫好皺)，不過我個心情真係好沉重，又喜又驚。喜嘅係小小豬大個仔終於有學返啦！驚嘅係唔知小小豬返學會係點，會唔會喊，會唔會同其他小朋友相處唔到，會唔會俾老師罵唔得老師鐘意......好多個問題係我腦入面。

再加上返學之後，小小豬每日都會有幾個鐘唔係我身邊，雖然話我返工嘅時候佢都唔係同我一齊，不過知道佢係屋企有小豬媽睇住，間唔中又有WHATAPP相俾我睇，都知道佢做緊乜。但返學之後，嗰幾個鐘頭真係唔知佢做緊乜，佢又要搭校車返學放學，雖然話係要對學校嘅老師同校車姨姨有信心，不過都總係好驚咁，所以都真係幾擔心呀。(大件事....依一刻...覺得自己有啲似怪獸家長添)

希望小小豬返學可以乖乖，順順利利，唔好太扭計啦！我都要好好調節吓自己心情，學會放心，同小小豬一齊迎接新環境！

為左保護小小豬嘅返學生活，我都唔講係小小豬係讀邊一間，同埋啲相會做少少手腳先同大家分享。如果大家憑一啲蛛絲馬跡睇得出係邊間嘅時候，都希望大家幫幫手唔好講出嚟，好讓小小豬有一個愉快同安全嘅校園生活呀！