暢游龍舟水

6 JUNE 2011 (MON)

期待已久嘅端午節終於都來臨啦！講真之後嘅端午節對我嚟講都真係唔太緊要，只係知道電視又冇嘢睇。不過今年就唔同，因為我地一早就PLAN好帶小小豬去游龍舟水，所以勁想快啲到。

今日個天氣都真係好好，不過為左唔好晒到小小豬又紅卜卜，所以我地決定早啲就去沙灘，咁就可以避過個猛烈陽光，所以我地一飲完早餐奶就出向我地個目的地 – 清水灣沙灘出發啦！

我地去到差唔多十一點半，開頭都以為咁早唔會太多人，點知一去到已經成個沙灘都係人好熱鬧。我地行到去最邊位置先搵到個位，雖然係邊啲不過係樹蔭底下，冇咁晒呀！

搵到個靚位，即刻幫小小豬換左件泳衣仔，開始游水啦~

開頭我都驚小小豬怕水會喊，不過原來佢都不知幾鐘意，只係有少少驚張，所以真係好叻叻呀~

大肥豬陪佢玩一陣之後，仲勁開心自己玩添~

因為我冇著泳衣關係，所以就由大肥豬負責落水同小小豬玩，睇吓佢兩父子玩得幾開心~

依個小小豬真係勁大膽，用雙手係度不停拍水添~

我只能係海邊同小小豬玩呀~

睇吓小小豬個樣幾ENJOY，睇佢個樣應該好鐘意游水，玩得好開心呀~

話晒都係第一次游水，所以我地都唔敢玩太耐，所以玩左一陣就要上水，之後就轉去玩沙。為免依隻為食豬仔拎啲沙嚟食，所以都係俾佢坐定定係沙灘蓆上面玩，不過小小豬都一樣玩得好開心呀~

玩完一輪見個太陽開始猛烈，所以我地就執嘢走人啦！

今日都叫做游過吓龍舟水應吓節，雖然我地都唔係玩左好耐，不過就玩得好開心，相信小小豬都好鐘意游水，所以我都決定左好快會再帶小小豬再去游水，再去沙灘又或者去吓泳池，不過就一定會約埋小豬媽同LULU姨，咁就多啲人陪小小豬，一定會仲開心呀！(哈哈...我都要快啲買件泳衣，到時可以落埋水同小小豬一齊玩呀！)